Don bun ki briew kiba tip bad iohi ia u ‘Tiew Dohmaw. Don ruh ki bym ju iohi satia wat lada ki la tip ia ka kyrteng jongu khamtam eh hapdeng ki khynnah skul ne khynnah pule jong kane ka juk mynta.Don ruh byllien ki bym tip satia wat ia ka jingmut kiba don ha lyndet jong ka jingmut u ‘Tiew Dohmaw ‘Laiphew -na-ar Jingmut. U ‘Tiew Dohmaw u dei uwei na ki jait syntiew uba kham pher,kham kyrpang bad kham phylla uba don ruh ka jingmut ba jylliew ha ka kyrteng jongu.Um ju long ne mih thala kum kiwei kiwei ki syntiew ha ki jaka paidbah ne ha ki jaka ba ka khmat briew ki nong leit ki nongwan kin iohi ia u. U ju mih tang ha ki jaka sanium ne ki jaka kyndong kaba lah ban kah ne tap da ki niut ki nier, hapoh ki synrang maw ne ki jaka ba kah na ka jingiohi ka khmat briew.Kham niar eh kiba iohi bad ioh phut ia u. Kham niar ruh kiba ioh thung ia u kumba ioh thung ia kiwei kiwei ki jait syntiew. Ki sla jongu kilong rong jngum kiba ia syriem kum ka jain mukmor, hynrei ki don pat ki jingpruid dak haduh 28 lain ha ki sla jongu.Dei na kine ki jingthoh lain ha ki sla jongu ba ki sa jer bad ioh kyrteng ia u kum U ‘Tiew Dohmaw Laiphew -na-ar- jingmut. Lai phew -na-ar- jingmut, ka mut 28 jingmut namar laiphew na-ar-, ka mut duna noh ar ban dap 30.Kane ka mut ba, ym ju don satia uno uno ne kano kano ka briew kaba janai ne biang lut nadong sha dong ha ka jingim jongki ha kane ha pyrthei hynrei ki jingduna hangne hangtai kin don beit ha uno uno ne kano kano ka briew wat la ki stad katno katno ruh ha kane ka pyrthei. La ju sin ne khot pat ia u briew uba proh jabieng,uba stad bad shemphang bad uba stad bad tbit ha ka pyrkhat pyrdain kum u ‘Tiew Dohmaw Laiphew- na-ar- jingmut.Hynrei,kam mut pat tang ba stad bad proh jabieng ban khot ‘Tiew Dohmaw Lai phew- na -ar- jingmut.Don kiwei pat ki jinglong u briew kiba kyrpang ha ka jingim jongu ba lah ban bishar ne ithuh ia u. U briew uba leh rit ne sngewrit, uba im hok,uba leh tip briew tip Blei ,ka jingim kaba shi sur shi dur hynrei uba khraw pat ha ka pyrkhat pyrdain, uba stad bad proh jabieng shibun eh(simple living but high thinking),uba ju buh rieh pat barabor ia lade na ka jinglong khlyllew paidbah( reluctance from acting popularity), uba im bad shakri hok ia la ka kam ne ka kamram ban pynmyntoi ia ka ri bad ka jaitbynriew khlem da pyrkhat tang khyndiat ruh ia ka jingmyntoi lade ne myntoi shi met, bad uba pyniaryngkat kyrdan ia lade la kum u ‘riew paidbah, kum ia uta kein ki khot u ‘Tiew Dohmaw Laiphew -na -ar-jingmut.Bun ki briew kim ju poi pyrkhat ne kim tip hi ruh ba kum uta ne kata ka briew ki dei pynban ki ‘riew stad ha kano kano ka shnong,ka thain ne ka ri bad ka jaitbynriew. Ki ‘riew sarong ki ‘riew khyllew, kiba ju leh (act) stad hanga mei,kum kita kim dei satia ki ‘Tiew Dohmaw Laiphew -na -ar-jingmut.Lada dei lei lei kiba bud ki pulit bad nongsynran(security) kat shaba ki leit ki wan, kum kita lei lei ki shu leh mynleh(act) kum ki Tiew Dohmaw hynrei kum dei satia. Ki lah ban dei pynban tang kum ki ‘Tiew Pathaw ne ki ‘Tiew eit.(kiba phuh tang shiteng por khlem mih soh ne symbai ei ei). Ha ka poetry “U Phlang Jyrrngam” jong u myllung Soso Tham na ka kot “Duitara Ksiar” jongu, la thoh shai kumne: Jar-jar hapoh ki dieng ha khlaw. U san hapdeng ki nuit: U Syntiew pher, u tiew-dohmaw; Laiphew-na -ar jingmut. Hynrei kum ia uta u briew uba stad bad proh jabieng, ki briew kim da salia than eh.Ki ju niew bein bad ibein pynban ia ki.Kim da kwah ithuh ne niewkor eh(recognised) ia ki kam ba khraw jongu namar ka jinglong shisur shi dur jongu.Ki briew ki kham burom bad niewkor pynban ia ki riew khyllew, ki riewspah,ki riew pawnam paidbah shipor kiba ju mlien ban kiew skong ha u ‘,Langtylli.Kumba long u myllung Soso Tham uba im bad shakri hok lyngba ki jingthoh ba kordor kiba kyrsiew thiah ia ka ri bad ka jaitbynriew lyngba u khulom ksiar ba nep bad ba proh jabieng jongu, yn shu tep bad tap noh tang da u phlang jyrngam hadien bun bun snem mynta. Jar-jar u im jar jar u jah, Hapoh rai-eh rai-dam; Jar-jar ha jingtep ai un thiah,– Hapoh u phlang jyrngam.
