ka jnc khliehriat ka shim iaki lad ki lynti kiba kham pyrkhing ha kaba ia dei bad ka surok

Ka Jaiñtia National Council (JNC) Khliehriat Circle ka la shim ïa ki lad ki lynti kiba kham pyrkhing da kaba ïakren bad u site engineer na ka Purbanchal Buildtech Pvt. Ltd., kaba dei peit ïa ka jingshna ïa ka surok National Highway kaba dang ïaid shakhmat ha ka thaiñ Khliehriat jong ka East Jaiñtia Hills.
Ki nongialam jong ka JNC Khliehriat Circle ki la pynpaw ba kane ka jingialang ka la long kaba donkam namar ka jingsngewkhia kaba la nang kiew ha kaba iadei bad ka jingjaboh kaba jur jong ka dewbilat kaba mih na ki kam shna surok , kaba ktah jur ia ki nongleit nongwan, ki samla pule, bad ki nongshong shnong.
Kham mynshwa, ka JNC ka la aiti ia ka memorandum sha u Deputy Commissioner, ha kaba ka la kyntu ia ka tnad ba dei peit ban pynthikna ban ai um man ka por ha ka por ba shna ia ka surok ban pynduna ia ka jing jaboh.
Hadien kane la iathuh ba la pynmih ia ka hukum sha ki kontraktor ban pyntreikam ia ki lad jingiada na ki pum pum. Hynrei la lap ba ki kontraktor kim shym la bud ryntih ïa ki jingbthah jong u Deputy Commissioner.
Halor kane, ka JNC ka la iakynduh ia u nongpyniaid ia ka jaka ban dawa ban leh kloi. Ha ka jingiakren jong ki, ki la pynpaw ia ka jingktah kaba sniew jong ka lyer pum pum (dust) ia ka koit ka khiah jong ki paidbah bad ia ka jingim ba man laka sngi, da kaba kyntu ba dei ban pynbeit ia ki jingkyrpad jong ki khlem da pynslem.Hadien ka jingialang, u engineer u la kular ban pyntuid um ia ka surok arsien shisngi nangne shakhmat
Ka JNC ka la ong, ‘Ngin sa buddien bha ia ka jinglong jingman ban pynthikna ia ka jingbud ryntih, namar ka koit ka khiah bad ka jingbha jingmiat jong ki briew jong ngi ka dei ban long kaba kongsan tam.’ Ka Council ka la maham ruh ba kan pynjur ia kane ka kam lada kim leh ei2 halor kane