Shillong – Ka Shnat Niam IIng Mane Mowkyndeng ka Mary Immaculate Conception ka la ioh ban pynkyntang lyngdoh ia u U Sohsla Kitbok Tyngkan jong ka Seng Jingiasyllok Salesian jong u Don Bosco myn ha ka 4 tarik u Rymphang 2024. U Lyngdoh Sad ka Jylla Niam Jowai u Bishop Ferdinand Dkhar u la long u kongsan ban jingpynkyntang Lyngdoh Sohblei ia u Dikon Kitboklang Tyngkan ha Mowkyndeng. Ka Mowkyndeng kaba don ha ka jylla niam Jowai ka la ioh ia u Sohblei uba phra na katei ka shnat niam ia kaba la sakhi ban long ka Khanatang pateng jong ka Balang Mowkyndeng ban kyntang lyngdoh da u Rev. Bishop Ferdinand Dkhar ha kaba Utei samla u la rai kut ban ai ka jingshakri ia ki paitbah hakhmat u Blei bad ka Balang kiba la rai kut ialade ban im duk, im sotti da ka jingim ban long ki shakri ha ka Bri Sohwaiñ u Khrist katba im ha pyrthei ha ka jingkylli pyrthew da u Lyngdoh Sad. Ha ban Kyntang ia u Kitboklang Tyngkan u Provincial ka Shillong Province u Sohblei Paul Orphindro Lyngkot u la wanlam hakhmat u Lyngdoh Sad ia utei u Dikon bad ba la wan aiti da ki kmie ki kpa. U Bishop Ferdinand Dkhar haba ai jingsneng sha u lyngdoh thymmai bad sha ki paid u Blei ba u lyngdoh u dei u shakri jong u Blei bad ia ki paid u blei bad ia ki Jaitbynriew baroh. Haba kyntu ia ki kmie ki kpa, kine ki saw ngut ki la ong, ” lada ki ing ki sem Khristan Katholik ki angnud ban pynmih shuh shuh ia ki riewniam ha ka Balang ki dei ban sdang na la ing da kaba im ia ka jingim kum ki Khristan kiba bha bad ban ialam lynti ia ki khun ha ka lynti kaba dei bad khamtam eh ban duwai lang manla ka sngi kum shi ing shi sem.” ” Ngi kwah ruh ba ka Balang bad ki longing longsem Khristan Katholik kin shim ia ka jingduwai kum u pa ia u ba khlaiñ khnang ban pynmih shuh shuh ia ki Lyngdoh Sohblei ha ka ri Khasi Jaiñtia,” Ha kaba iadei bad kane na ka liang jong ki ki la ong ruh ha kaba sdang ki don bun ki dieng pyngkiang bad ki lynti iaid kiba jwat ban poi sha ka jinglong Lyngdoh.” Ngi dang donkam ban pynmih shuh shuh ia ki riewniam ha kane ka Jyllaniam jong ngi namar ngi don ia ka lyngkha trei kaba iar ha ka Jyllaniam,” ong u Bishop.Ha ka jingkyntang lyngdoh sohblei i ryngkat lang rwai ka risa na ki paid u Blei da ka jingkhot jingwer ban wanlam sha ka duwan da ki kmie ki kpa ia kaba la pynbna da u Sohblei Bernard Pala. Shuh shuh ha katei ka jingpynkyntang Lyngdoh la synran lang ia u lyngdoh thymmai da u Parish Priest u Sohblei Henry Warbah bad ki lyngdoh sohblei baroh.U Dikon Kitboklang Tyngkan u dei na ka shnong Mowkyndeng, U kpa jong u, u Ma Pakalang Phawa na ka shnong Mutong, East Jaintia Hills u dei u ba na ka niamtre. Ma u bad kiba haiing ha sem jong u ki la rung sha ka Balang Katholik ha ka 18th u Risaw 1978 bad ki la long ki nongseng ba nyngkong ia ka balang ha ka shnong Mutong.Ka kmie jong u Dikon ka kong Hoidien Tyngkan, na ka shnong Mowkyndeng, ka dei na ka balang Presbytarian bad hadien ba ka la iapoikha bad u ma Pakalang Phawa ha u snem 1984, ka la rung noh sha ka Balang Katholik da ka ba pdiang ia ka Baptisma ha ka 25th u Nohprah 1986 ha Jowai Parish. Ïa u Dn. Kitboklang Tyngkan SDB, la kha ha ka 6 tarik Ïaiong, 1993, ha Mowkyndeng, West Jaiñtia Hills Distrik. Ki don khatwei ngut shipara, san ngut ki kynthei bad hynriew ngut ki shynrangbad u Dikon u dei u khun u basan na ki khatwei ngut. 3 ngut ki la khladnoh, i wei i kynthei bad arngut ki shynrang.U la ïohpdiang ïa ka Sakrament Baptisma ha ka 25 tarik Nohprah, 1993 da u Ph. Francis Kalariparampil SDB, u la ïohpdiang ia ka Kommunion ka Banyngkong ha u snem 2001, bad u la ïohpdiang ïa ka Sakrament Jingpynskhem ha ka 16 Nailar 2007, ha Savio Juniorate, Mawlai, da u Lyngdohsad Dominic Jala SDB D.D. (bam kwai ha Ïng u Blei).U Dikon u la pule ha St Francis Mowkyndeng, naduh u snem 1997 haduh 2002 bad u la pule naduh ka klas Nursery haduh IV, bad naduh klas V haduh VII u la pule ha St. Dominic Higher Secondary School, Mowkyndeng, 2003-2006. Ha u snem 2007, u la shah jied ban leit sha Savio Juniorate Mawlai, Shillong, kum u khynnah aspirant bad u la pyndep ïa ka klas VIII-X (2007-2010). Hadien ka klas X la phah ïa u ban leit sha Bosco Mount, Rongkhon Tura, 2010-2012, ban pyndep ïa ka klas XI bad XII. Hadien kane, 2012-2013, u la leitsha Mariamnagar, Agartala naka bynta ka Pre-Novitiate. Hadien ka Pre-Novitiate, 2013-2014, la phah ïa u sha Novitiate, Sunnyside, Upper Shillong bad u la shim ïa ka jingsmai riewniam ka banyngkong ha ka 24 tarik, Jymmang 2014. Hadien ka novitiate, 2014-2016, ki bahalor ki la phah ïa u ban pule ïa ka Bachelor of Philosophy (B.Ph.) sha The Retreat, Jnanodhaya Salesian College, Yercaud, Salem distrik, Tamil Nadu. Hadien ka B.Ph., 2016-2018, u la leit pule ïa ka Master of Philosophy (M.Ph.) ha Divyadaan, Salesian Institute of Philosophy, Nashik, Maharashtra. Hadien kane, ki bahalor ki la phah ïa u ban leh ïa ka Practical Training kaba ar snem 2018-2020, ha Salesian College of Higher Education, Dimapur, Nagaland. Ha ka 22 Tarik Jymmang, 2020 u la shim ïa ka jingsmai bakhatduh ha Salesian College of Higher Education, Dimapur. Hadien ka practical training, 2020-2023, u la pule ïa ka Bachelor of Theology ha Sacred Heart Theological College, Mawlai, Shillong. La pynkyntang Dikon ïa u ha ka 1 Tarik Naitung, 2023 ha Scared Heart Shrine, Sacred Heart Theological College, Mawlai, Shillong.
