Shillong, 25 Naiwieng 2025 : Ka Sorkar Meghalaya kan pynlong ïa ka jingïalang kabinet ha ka 26 tarik Naiwieng 2025 ha Ward’s Lake, Nan Polok, Shillong, ka la wanrah shibun ki jingkylli bad ka jingïashongshit jingpyrkhat paidbah halor ka jingthmu jong kane ka sien shong kabinet kaba la kham pher na ki juk bala leit.
Kum ban shu kdew, ka kabinet man ka por la ju pynlong ha ka kamra kabinet ha Secretariat bad ha CM Bungalow. Hynrei kane ka sien, ka Sorkar ka la jied ia ka jaka jngohkai pyngngad kum ka jaka ïalang, kaba la pynlong ïa ki paidbah ban kylli balei ym ïa ka jaka ba ju long.
Ki paidbah bad ki nongkren paidbah ki la pynpaw ïa ka jingsngew lyngngoh bad ka jingïabiria, da kaba ong ba kane ka la kham iajan bad ka pyngngad jabieng jong ka kynhun Myntri hapoh ka jingïalam u Conrad K. Sangma, haduh ba ki don kiba kdew ruh ba ka sngew kumba ka Sorkar ka leh Cabinet Festival.
Tangba, ka Sorkar kam pat ai jingtip shai kiei ki mat kongsan ba yn ïakren ha kane ka jingïalang. Hynrei kat kum ki riewpawkhmat paidbah, ka lah ban long ba ka Sorkar ka thmu ban wanrah ka jingjan hapdeng ki paidbah bad ki nongmihkhmat, wad jingtip na ki tnad bapher, shaphang ka rukom treikam Sorkar.
Kane ka dei ka sien kaba nyngkong eh ha ki 53 snem jong ka jylla Meghalaya ba ka Kabinet kan pynlong ïa ka jingïalang ha ka jaka jngohkai pyngngad — kaba la pynkylla histori ha ka Sorkar MDA.