Shillong, 3 tarik Rymphang- Ka long kaei kaei kaba thamula ia ki seng riewlum hadien ba ki la dep jop ia ka elekshon MLA ki slem palat; ban shim rai ban iathaw sorkar.
Haba iapeit ia ka jingioh bun seat na ki seng riewlum ka dei ka United Democratic Party kaba ioh 11 seat bud ka seng Voice People Party, 4 tylli, ka HSPDP 2 tylli, PDF 2 tylli.
Haba ia peit ia ka Seng UDP kaba bun paid kam lah ban thaw sorkar lada ki iasnoh bad ka VPP, PDF, HSPDP bad kam nym poi shaei shaei ruh.
Lada khot lang ia ka TMC kaba jop 5 bad Congress 5 kata la lah ban thaw sorkar thymmai lang khlem ka BJP bad NPP.
Ka jingkylli mynta ka mih hato ki seng riewlum kin mih kawei ka sur ban iatylli; ban thaw sorkar.
Haduh katno ka UDP ka lah ban khring ia kiwei ki paralok ban iathaw sorkar; hato u Metbah Lyngdoh MLA Mairang u lah Mo ban iadei jingmut bad u bah Paul Lyngdoh.
Namar la tip hi ka UDP kam ju lah hi ban shim rai bad ka suki bha ban trei kam; ym tip na kaei ka daw katba ki seng National Party ki long Kiba stad bha bad shemphang ban lum ia ki paralok seng sain pyrthei ban ia pynbeit ban thaw sorkar.
Nuksa u Nongialam NPP u Çonrad K Sangma naduh na Garo Hills u wan her sha Shillong ban lum ia ki MLA lajong bad ban iakren bad ka BJP.
Wat ka seng VPP kaba dang thymmai ka la dep kren lah ban iatreilang bad ka NPP ne BJP, kaei ka jingmut jingpyrkhat jong u Bah Ardent Miller Basaiawmoit na ka bynta ki paid nongshong shnong ka Jylla kiba pynjop ia seng jong u.
Ka VPP kan noh tarajur ne em ban thaw sorkar bad ki para seng riewlum lada dawa ha ryngkat ka don lang ka TMC bad ka Kongress.
Ka HSPDP bad ka PDF kam don jingeh ban iasnoh badno badno ruh ka jubab ba shai kaba paw mynta ka long beit u Bah Ardent Miller Basaiawmoit, u Bah Paul Lyngdoh bad u bah Metbah Lyngdoh ki lah ne em ban iatreilang.
Lada kitei ki lai ngut ki kloi ban iatreilang bad sngewthuh jingmut khlem pep lah ban thaw sorkar khlem ka BJP bad NPP; lah ruh hi ruh ban ioh Myntri Rangbah da u Khasi.
Kaba eh mynta ka Jaidbynriew khasi kaba pyrta ieid jait bynriew bad dawa ruh dei ban ioh Chief Minister da u Khasi hynrei ha la Iing lasem lajong dang pra dang iashrut jynjar ban ioh Nongialam paradoh parasnam.
Haba iaphai sha ka seng All India Trinamool Congress ka lah mo ban iatreilang lang bad ka Kongress ne bad ki seng riewlum.
La sngewthuh shai u Dr Mukul Sangma u pdiang hun ia ka UDP ban shim ia u lakam synshar tang ban lait na ka NPP bad BJP.
