Shillong, Rymphang 13 : Ka jingthmu babha jong ki bor pyniaid ka St Anthony’s College ban pyntreikam kam da ki jaiñ uniform ia baroh ki samla pule kiba pule ha katei ka Kolej namar ka suk bad ka long ka burom ka ijot ia longrynieng manrynieng ka long ruh ka burom ka akar khamtam ia ki kynthei.
Da ka jingpyntreikam da ka Jaiñ Uniform ka long ka jingpyrshah na ki katto katne ki samla pule katei ka Kolej, ha ryngkat ka NEHU Students Union (NEHUSU), kila pynpaw ia ka pyrshah ia ka hukum jong ki bor pyniaid College ban bthah ia ki samla pule ban phong jaiñ college ne uniform.
Kine ki samla pule kila leit ban iakynduh ia u Principal ka College Rev Br Dr Albert Dkhar ban pynsngew ia ka jingeh jong ki samla pule na kane ka hukum ba syndet syndet jong ka College.
Tang ki samla kiba pule ia ka 4th Semester, kiban sa pule sa ia ka 5th Semester, ka semester ba khatduh ban pyndep ia ka jingpule kim kwah ban pyntreikam ia katei ka kyndon ban phong jaiñ uniform.
Lah ban kdew baka St. Anthony’s College Shillong, haka 29 tarik Naiwieng, kala pynmih iaka hukum ba bthah ia baroh ki samla Pule ba kin phong noh daki jain college lane Uniform haba wan sha klas naduh mynta u snem.
Kitei ki samla kiba pyrshah ia ka uniform ki pynlong ka jingiakhih da ka signature campaign b ia ka jingpyrshah halor kane ka hukum jong ka College bad pyntip ba haduh 400 ngut ki samla pule kila ai jingkyrshan iathuh u samla Arman Malniang.
Na ka Liang ki samla pule ba pyrshah ki dawa na u Principal ba dei ban pyllait noh ia ki samla pule 4th Semester na ka hukum phong uniform ban wan klas iathuh u samla Arman Malniang.
U Samla Arman Malniang u iathuh satang shi semester ban pyndep ia ka jingpule bad ki uniform ki dei kiba shongdor da T.5000 tam, kumta ka ktah ia ka ioh ka kot jong ki kmie ki kpa ula ong.
. U iathuh ba ia kane ka rai ki samla pule ruh la pyntip sha u Principal khnang ba un nym shim ia kano kano ka lynti ban pynshitom ia ki samla pule.
Hynrei u iathuh ba u Principal u khlem ai satia ia kano kano ka jingkular halor kine ki jingdawa bad pyntip ba un sa rah iakren ia kane ka jingeh ki samla pule sha ki bor bahlor kiba dei ki Salesian.
Haba kylli u samla Arman ula pyntip ba iaka hukum ba pynmih ban bthah iaki samla pule ban phong uniform la pynmih daka Governing Body jong ka College.