Meghalaya : Hadien ka jinglong jingman jing ka dong ka thaiñ Ranikor ha kaba ki paidbah kim don jingieid ne jingsynei shuh ïa ki doh um doh wah ha kaba bunsien ki ju pynïap dusmon da kaba ber bih, siat bom, pynhap jar bad kiwei kiwei , ki Riew Rangbah jong ka thaiñ Ranikor kiba ieid ïa ka kam khwai kum shibynta ban teh lakam bad ban pynneh pynsah ïa ki doh um doh pnat ki la seng ïa kawei ka seng kaba tip kum ka Synjuk ki Nongkhwai Dohkha Ranikor Civil Sub – Division.
Ia kane ka synjuk la seng ïa ka ha ka 2 tarik u Risaw 2025 bad ka jingthmu jong ka synjuk ban seng ïa kane ka kynhun ka long ban pynneh pynsah ïa ki doh um doh pnat baroh kiba im hapoh um, ban pynroi ïa baroh ki jait doh um ha ki wah heh bad ki wah rit kiba don ha ka thaiñ Ranikor, ban pynsngwthuh ïa ki paidbah kumno ba kin ïeid ïa ka mei mariang lyngba ka jingpynneh pynsah ïa ki doh um bad kumjuh bad leit pynlong jingïalang ai jinghikai ( awareness) ha baroh ki dong ka thaiñ jong ka Ranikor Sub – Division.
Ym tang katta ka synjuk ka don ruh ka jingthmu ba lyngba ki wah yn pynlong kum kawei ka lad kamai ïa ki paidbah ka dong ka thaiñ hadien habud.
Kumta ka synjuk ka la khang pyrshah ban pynïap dusmon ïa ki doh um ha baroh kawei ka Ranikor Civil Sub Division naduh ïa ki wah heh bad ki wah rit da kaba tong Tynsong, kawang lane pynhap jar , siat bom lane sum ïa ki dohkha ha ka por miet bad baroh ki jait dawai bih bqd ka la
maham tyngeh ruh ba lada lap ïa kiba ïaleh pyrshah , ka synjuk kan pynshitom kat kum ki kyndon aiñ.