Shillong, 13 Risaw:
Ki nonghikai jong ka Sarva Shiksha Abhiyan (SSA) hapoh ka jinglamlakar u President jong ka All Meghalaya SSA School Teachers Association (AMSSTA), u Aristotle Rymbai, ki la leit ban kynduh ia u Myntri Rangbah ka jylla, u Conrad K. Sangma, ban ia kren halor ka jingeh ba ki mad ha kaba iadei bad ka baihikai bad kiwei ki jingdonkam jong ki nonghikai.
Haba kren sha ki lad pathai khubor hadien ka jingialang, u Rymbai u la ong ba ka jingialang mynta ka sngi ka long kaba “sngewbha bad seisoh.”
U la pyntip ba ki ar tylli ki mat bah kiba ki la wanrah hakhmat u Myntri Rangbah kadei — nyngkong, ka jingdawa ban shimti pura da ka sorkar ia ki skul SSA, bad ba-ar, ka jingpyntreikam ia ka service structure na ka bynta ki nonghikai SSA.
U Rymbai u la ong ruh ba u Myntri Rangbah u la pyntip ba kine ki ar tylli ki jingdawa ki la poi ha ka bynta kaba khatduh jong ka jingbishar. Ka sorkar ka la buh jingialang biang ha ka Sngi Palei, kaba yn long hapoh ka jingialam jong u Myntri Rangbah hi, ha ryngkat u Myntri Pule Puthi bad ki heh ophisar jong ka tnat pule puthi.
“Hadien ka jingialang ha ka sngi Palei, ngin ioh jingshai kaba kham bniah halor ka rai jong ka sorkar ban pynurlong ia ki jingdawa jong ngi,” la ong u Rymbai.
Haba kylli halor ka hukum jong ka Supreme Court kaba iadei bad ki nonghikai SSA, u Rymbai u la ong ba kane kam shym la long bynta jong ka jingialang mynta, hynrei ki la kynduh ia u Myntri Pule Puthi na ka bynta kane ha ka taiew ba la dep.