Shillong, 31 Naitung 2025 – U Dr. Mukul M. Sangma, Myntri Rangbah barim ka jylla Meghalaya bad u nongialam ba rangbah ka Trinamool Congress (TMC), u la ther jur ïa ka Sorkar MDA ha ka 31 tarik Naitung ha ka jingialang bad ki lad pathai khubor ha Shillong, halor ka jingbym lah ka sorkar ban tehlakam ïa ka jingwan tuid palat ki briew sha jylla (influx).
Ha kane ka jingïakren sha ki nongthoh khubor, u Dr. Mukul u la kynnoh ba ka sorkar ba mynta ka la pynbiej paidbah bad pynlong ia ki mat kiba khraw kum ka ILP (Inner Line Permit) bad ka MRSSA (Meghalaya Residents Safety and Security Act) tang kum ki mat jong ka jingiakhun sain pyrthei, khlem da don ka jingsngewkhia kaba shisha ban pynurlong ne pyntreikam hok.
“Ka sorkar ka shu pyni nuksa ba ka trei, hynrei dei tang ha ka jingkren, ym don eiei ba la lah ban pyntrei kam. Kane ka dei ka jingpynbiej paidbah da ka jingsngew ba u paidbah un shu pdiang khlem wad jingtip shuh,” la ong u Dr. Mukul.
U Dr. Mukul u la ong ruh ba naduh ba la wan ka sorkar MDA, kam pat don satia ka framework ba shai ne ka lynti kaba biang ban tehlakam ïa ka influx, kaba long ka jingma ïa ka akor ka burom, ka niam ka rukom bad khamtam ïa ka hok long trai jong ki paidbah nongshong shnong rit paid ha ka jylla.
U la pynpaw ruh ba ha ka por ba u dang long Myntri Rangbah, ka sorkar jong u ka la shim bun tylli ki sienjam ban wanrah ka jingkhanglad ïa ka jingwan rung laitlan jong ki briew nabar. U la ong ba ka MRSSA kaba la wanrah ha kata ka por ka long ban pyntreikam halor ka jingpynshisha jong ka longtrai shnong bad ka jingbuh kyrteng kyrpang ïa ki nongwan shong shnong ba nabar.
“Hynrei mynta, ka sorkar mynta ka la shu kular, kular bad pynbiej. Ym don ka ILP, MRSSA ruh ym treikam. Ka jylla ka sah ha ka jingma lada long kumne,” la bynrap u Dr. Mukul.
U la dawa ba ka sorkar MDA kaba ialam da u Conrad K. Sangma ka dei ban shimkhia bad pynbeit noh mardor ïa kine ki mat kiba ktah jur ïa ka bha ka miat jong u paidbah bad ka jylla hi baroh kawei.