Lyngba ka jingtherbom kaba shyrkhei kaba la tip da ka “Operation Sindoor”, ka India ka la therbom ha ki 9 tylli ki jaka bapher bapher ha Pakistan kaba ka India ka la kam ba ki dei ki jaka sah bad ki jaka training jong ki lehnoh ha katei ka ri bad ki jaka kiba la plan na ka bynta ban siat naphang ia ki riew paidbah ha Pahalgam ha ka 22 tarik u Iaiong, 2025 ha kaba 26 ngut ki riew lui lui ki la duhei ia la ka jong ka jingim.
Lyngba kane ka operation sindoor ka India ka la ther hapoh u pud u sam jong ka Pakistan ha kane ka kynti kata hadien ka thma ha u snem 1971 ba kane kadei kawei na ki rai kaba shlur kaba ka Delhi ka la shim hadien ka snem 1971 ban hiarthma ia ki lehnoh.
Ha kane ka jingkhyrwit jong ka India ia ki jaka sah jong ki lehnoh ha ka Ri Pakistan la iatreilang hadpeng ki shipai duriew, ryngkew bad shipai suin.
Kane ka jingkyrwit ha u pud u sam jong ka Pakistan ka long beit thik ia ki jaka jong ki seng lehoh kata jong ka seng Jaish-e-Mohammed (JeM) bad ka Lashkar-e-Taiba (LeT) kiab dei ki kynhun seng lehnoh kiba ju don bynta ha ki kam pyntriem ha India.
Lah ban kdew hangne ba kiba kum kine ki jingkhyrwit kiba ka India ka la leh ka long ha ka por thma India Pakistan ha u snem 1971 kaba la jia ha ka por ba ka Bangladesh ka don ka jingiakhun ban pynioh laitluid.
Napdeng kitei ki 9 tylli ki jaka kiba ka India ka ka la thermon hynne shiteng synia ki kynthup ia ki 4 jaka kiba hap beit hapoh u pud u sam jong ka Paskistan bad 5 tylli ki dei ki jaka kiba ka India ka la kam ba ki dei ki jaka jong ka India kaba la kurup noh da ka Pakistan.
Kine ki 9 tylli ki jaka kiba ka India ka la hiarthma ki kynthup ia ka 1. Markaz Subhan Allah, Bahawalpur – JeM, 2. Markaz Taiba, Muridke – LeT, 3. Sarjal, Tehra Kalan – JeM, 4. Mehmoona Joya, Sialkot – HM, 5. Markaz Ahle Hadith, Barnala – LeT, 6. Markaz Abbas, Kotli – JeM. 7. Maskar Raheel Shahid, Kotli – HM 8. Shawai Nalla Camp, Muzaffarabad – LeT bad ka 9. Syedna Bilal Camp, Muzaffarabad – JeM.
Shuh shuh ka ha kane ka jingkhyrwit kaba tyngeh pyrshah ia ka Pakistan kam shym la pynrung satia ia ki liengsuin turthma hapoh u pus u sam jong ka Pakistan, hynrei ka la khyrwit na u pud u sam jong ka India hi bad la dei ban thik ia ki jaka kiba ki shipiai ki la thmu bad ym shym la don ka jingpynjulor ia ki jaka jong ki bor shipai Pakistan lait noh tang ia ki jaka jong ki lehnoh.
