Shillong, Naitung 1: Ka kynhun myntri ka Sorkar jylla myn ha ka 1 tarik u Jymmang ka la mynjur ia ka Vehicle Scrappage Policy (VSP), ha kaba kumba 13 hajar tylli ki kali rim yn weng noh lada ki iaid ha ki surok ha ka bynta ba nyngkong.
Haba pyntip ia kane, u myntri ka tnad sorkar uba dei ruh u nongaiktien ka MDA u bah Paul Lyngdoh u la ong, “Ngin sa weng noh ia kane ka kam da kaba weng shwa ia ki kali sorkar kiba la 15 snem shaneng, kumba 5 hajar tylli eiei ki kali sorkar ki wan hapoh ka scrappage policy bad yn weng noh ia ki na surok.”
Haba ïadei bad ki kali jong ki riew shimet, u la bynrap, “Ngin pyntreikam shwa ïa ka policy da kaba buh pud ïa ki kali kiba la 35 snem shaneng, bad ki don kumba 8,000 tylli kum kine ki kali.”
U la ong shuh shuh, “Baroh, 5,000 tylli ki kali sorkar bad 8,000 tylli ki kali shimet ki long 13,000 tylli ki kali ki ban iaid shabar surok katkum kane ka policy.”
Haba pynksan ïa ki jingmyntoi jong ka policy, u Lyngdoh u la ong, “Ka jingmyntoi kaba kongsan ka long ban ailad ïa ka sorkar ban pynduna ïa ka jingjaboh, ban pynduna ïa ka jingwanrah umphniang nabar ri, bad ban kyntiew ïa ka jingpyndonkam biang ïa ki mar rep.”
U la pyntip ruh ba ka nongbah Shillong mynta ka don kumba 2,76,262 tylli ki kali kiba la register.
Katkum ka jingong jong u, kane ka sienjam ka ïahap bad ki jingthmu kiba kum kine kiba la shim ha kylleng ka ri .