Shillong Kyllalyngkot 16: Ka Seng Kur Dkhar Sawkpoh ka la rakhe ia ka Jubili Rupa myn ka 13 tarik u Kyllalyngkot, 2024 ha Maraikaphon, Sohra ha kaba hajar ngut ki kur bad ki Rangbah Ka Seng Kur Dkhar na Ri Lum Jaintia ruh ki la ia wan sha kane ka Durbar. La plie ia ka jingrakhe Jubili da kaba pynher ia ka Lama jong ka Seng da u President, Bah Taining Dkhar Ngapkynta ryngkat bad ki Rangbah kur, ki Longkmie bad ki Executive Member jong ka Seng.
Ka Kong Khasimon Phanbuh, Ex-General Secretary jong ka Seng, I Padma Shree Kong Bertha G. Dkhar Ngapkynta, ba la thaw ia ka Braille code Khasi Grade I bad Grade II bad u Bah Donavon Kharwanlang, u Kongsan jong ka Jingialang, ki la ai jingkren halor ki “Mawbyrsiew” ba ki Kpa Tymmen jongngi ki la tei bad pynshongrim ia ka imlang sahlang ka longbriew manbriew bad ruh halor ka Tien Phira – “Ka Tip-Briew Tip-Blei bad ka Tip-Kur Tip-Kha”.
Ha kaba sdang jong ka jingrakhe ia ka Jubili Rupa, i Bah Taining Dkhar Ngapkynta I la pynkynmaw ia ki longshuwa kiba la seng ia ka Seng Kur ha ka snem 1999 bad ia kito ruh kiba la shimti pateng ban ia kit ia bah ia ki kam jong ka Seng Kur haduh mynta. I Bah Peter A. Dkhar Sawian pat I la pynkynmaw bad pynsawa ia u synniang ba la noh sha ka imlang sahlang naduh ka spah snem kaba 18 bad 19 da ki Longshuwa jong ka Kur ha ka liang ka pule puthi, ka seng-kam seng-jam, ka synshar ka khadar bad ka longbriew manbriew.
La don ruh ka jingsam khusnam ia kito kiba pass bha ha ki jingpule bad jingialeh kai sport Athlectic bad Karate bad ka jingot ia u cake Jubili Rupa da i Padma Shree Kong Theilin Phanbuh bad ka jingpynher ia ki 25 tylli ki balloon Jubili Rupa.