Shillong, 4 March: Ka jingpyni ïa ka phlim “Ha Lyngkha Bneng” kan long ha Shillong, bad la khmih lynti ba kan wanrah ïa ka jingïatai kaba jylliew hapdeng ki nongpeit bad ki nongshna phlim.
U nongshna bad nongdirect phlim ba pawnam, Pradip Kurbah, uba la tip bha lyngba ki phlim kum Iewduh, Onaatah bad Mon Bajwat, u la pynbna ïa ka jingpyllait paidbah bad ka jingpyni (screening) ïa ka phlim ba thymmai jong u kaba kyrteng “Ha Lyngkha Bneng.”
Haba kren sha ki lad pathai khubor ha Shillong, u Bah Pradip u la ong ba ka jingïaid lynti jong ka phlim kam dei tang ban leit sha ki Tamasa (festival) ha shabar ri, hynrei ka long kaba kongsan eh ban pyni shwa ha la ri bad ha la shnong. U la pynpaw ba bunsien ki festival kim pdiang lada phim don ka jingïadei bad la ka jylla ne la ka ri hi.
“Ka long kaba kongsan ban sdang na la ïing la sem. Lada phim don ka jingïatylli bad ka audience ha la shnong, kan eh ban leit shakhmat,” la ong u Bah Pradip.
Ka jingkongsan ka jingïakren bad ka audience
U la batai ruh ba ka jingïapyni phlim ha theatre ka long kaba pher na ka jingpeit phlim ha laptop ne mobile. Hadien ba kut ka phlim, ki nongshna phlim ki ioh lad ban ïakynduh bad ki paidbah, ban ïakren bad ïatai halor ka khana bad ki jingmut jingpyrkhat jong ka phlim.
“Ha theatre, ngi ioh ban ïadei bad ki paidbah. Ngi sngewthuh lada don ei ei kaba bakla ne kaba dei ban pynbha. Hynrei lada peit tang online, ngim ju ioh ka lad ban ïakren bad ki,” la ong u.
Ka jingkyrshan na ka Sorkar bad ki riew shimet
U Bah Pradip u la ai jingïaroh ba ha kine ki snem ba dang shen, ka jingpynleit jingmut ïa ka cinema ha Meghalaya ka la sdang ban kham khlaiñ. Wat la ka jingïarap subsidy kam dei kaba neh, hynrei ka don ka jingpyrshang na ki riew shimet kiba thrang ban kyntiew ïa ka kolshor Sinema ha jylla.
U la kdew ruh ba ka jingthmu jong ka Sorkar ban sdang ïa ka Film School kan long ka jingïarap kaba khraw eh ïa ki samla kiba kwah ban rung sha kane ka bynta. U la kyntu ïa ki samla pule ba kim dei ban leit trei shabar tang namar ka jingkwah kam, hynrei ban pyrkhat ruh ban wanphai sha la jylla ban shna bad kyntiew ïa ka cinema Khasi.
“Ha Lyngkha Bneng” ka dei ka phlim kaba kren shaphang ka jingmih shnong (migration), ka jingtymmen, ka jingsngew marwei (loneliness) bad ka jingkongsan ka jingïatylli ha shnong ha thaw. Ki mat kiba ka phlim ka kren ki long kiba ïadei bad ka imlang sahlang mynta.
Ka phlim ka la buh ïa ka por ha u snem 2047 – ka por kaba hadien, hynrei ka jingthmu ka long ban pyni kumno ki shnong kin kylla lada jingïaid shnong bad jingmih shnong ka iai bteng. U Bah Pradip u la ong ba kane ka long kum ka jingmaham ba ngim dei ban duh noh ïa ka mynsiem jingïatylli ha shnong.
Ka khubor sha ki nongshna phlim
U la ong ruh ba ki nongshna phlim ki dei ban kylli ïa lade lada ki paidbah kim wan peit phlim shuh. “Ngi dei ban pyrkhat lada don ei ei kaba bakla ha ka rukom shna phlim. Sinema ka dei ka pdeng kaba khlaiñ, hynrei ngi dei ban long kiba shisha bad kiba hok ha ka jingthmu jong ngi,” la ong u.
U la pynkut da kaba ong ba ban kyntiew ïa ka kolshor sinema ha Meghalaya, ka donkam ïa ka jingïatreilang hapdeng ka Sorkar, ki nongshna phlim bad ki paidbah. “Lada ngi kwah ba ka cinema Khasi kan kiew shaphrang, ngi dei ban ïatylli lang,” u la bynrap.