Ka Iran ha ka sngi Nyngkong kala ong ba ka dang plie ïa ki lad ki lynti jong ka jingïadei bad ka Washington katba u president jong ka US u Donald Trump u dang pyrkhat kumno ban jubab ïa ka jingpynshitom beiñ jong ka Iran ïa ki nong iakhieh ha baroh kawei ka ri Iran kaba long kawei na ki jingshah tynjuh kaba jur tam jong ka naduh ba kala kylla Islamic ha u snem 1979 ba la ïalam da u Nongïalam ba hakhlieh duh kata u Ali Khamenei kaba la pynhap jubor noh ïa u Shah.
U President ka ri America u Donald Trump ha ka sngi Nyngkong ula pynbna ba kano kano ka ri, kaba ïatreilang bad ka Iran, kaba dei ka ri kaba heh ha ka jingpynmih umphniang, kan mad ïa ka khajna kaba thymmai kaba kot sha ka 25% halor ki mar ki mata ba shalan sha bar ri. Kane ka hukum ka long kaba kut bad kaba kut” ong u Trump ha ka jingthoh jong u ha social media, khlem da ai jingtip patde shaphang ka bor ain kaba un pyndonkam ban pynjari ia ki khajna, lane kan thmu ne em ia baroh ki paralok ba ia khaii pateng bad ka Iran, Ka White House kam shym la kren eiei halor kane ka bynta.
U myntri ki kam bar ri jong ka Iran, U Abbas Araghchi, u la ong ha ka sngi Nyngkong ba ka Islamic republic ka la long kaba la pynkhreh na ka bynta ka thma bad ka jingiakren ruh kumjuh hadien ka jingbyrngem ba bunsien na u President jong ka US u Donald Trump ban rung bad ban leh da ka kam shipai halor ka jingpynshitom bein ia ki jingiakhih ha kaba da ki spah ngut ki nongiakhih kila shah pyniap bein ha ki bor iada ka ri iran naduh ka taiew bala dep.
Ka seng ba dei peit ia ka hok longbriew manbriew kaba don ha US, ka HRANA, ka la ong ba haduh ka janmiet jong ka sngi Nyngkong, ka la pynshisha ia ka jingiap jong ki 646 ngut ki briew, kynthup ia ki 505 ngut ki nongiakhih, 113 ngut ki shipai bad ki bor pahara bad hynniew ngut ki kiwei pat, bad mynta ka dang don ha ka jingtohkit ia ki 579 ngut kiba la iathuh ba ki la iap. Naduh ba la sdang ki jingiakhih ha ka 28 tarik u bnai December, ki la don 10,721 ngut ki briew kiba la shah kem, ong ka khubor jong katei ka kynhun.
Ha kawei pat ka liang Ka Virtual Embassy jong ka United States kaba don ha Iran ha ka sngi Nyngkong ka la pynmih ïa ka jingbthah ïa baroh ki nongshong shnong jong ka ri America kiba sah bad don ha iran ban ieh noh ïa ka Iran mynta, da kaba maham ba ki jingïakhih ha kylleng ka ri kila nang pynjur shuh shuh mynta bad ka lah ban don jingma ia ki nong America ha Iran.
Ka jingai jingmut ka la pynpaw ruh ïa ki jingthut ha ka leit ka wan, da kaba kdew ba katto katne ki kompeni liengsuiñ ki la khanglad ne pynsangeh ïa ki liengsuiñ sha bar ri bad hapoh ka ri Iran hi naduh ba Iran kala khangdam ia ka bor internet ha baroh kawei ka ri bad kala kyntu ia ki nongshong shnong jong ka US ban shim ïa ki lad jingïada mardor, ka embassy ka la ai jingmut ruh ba kin pynkloi ban mih noh na Iran da kaba pyndonkam ia ki lynti khyndew sha Armenia bad Turkey.