Ka Khasi Student Union ha ka 1 Tarik u Nailar 2024, ka la pynlong da ka jingiakhih da ka ba shong kyllain mungor ha ka ophis treikam ka Meghalaya Public Servive Commission (MPSC) ,hadien ba ka la kut ka 48 kynta ba ka la ai por ba kan pynbeit bad pynshai halor ka kynrum kynram ka eksamin thung kam na bynta ka MCS, MPS bad Statistical Officer
Ha kane ka sngi ka seng ka la thang bad tar ruh shisyndon ïa ka shithi hakhmat ka ophis treikam ka commission ban pyni ia ka jingbymhun katba ka jingiakhih shong kyllain mongor ka iai bteng.
Haba kren sha ki lad pathai, U samla Reuben Najiar u Chairman, Employment Monitoring Cell, u la ong ba ha kaba iadei bad ka resol jong ka Statistical Officer, A.H Veterinary ka la jied ia 2 (ar ngut) ki samla, iwei na ka Khasi-Jaintia category bad uwei na ka Garo category katkum ka notification ba lah pynlait ha 27.06.2024. Hynrei kaba sngew lyngngoh ka long ba katkum ka advertisement ba la pynmih ha ka 14.12.2020 pat, ka jinglait kam ka dei tang na bynta 1 (kawei) bad ia kane la pynskhem biang da ka Corrigendum ba lah mih ha ka 14.09.2022 kaba dei ban dei thik tang ia kawei ka post na bynta Khasi-Jaintia category.
Lah ban kdew ba ka Seng kam sngew iahap ia ka jingpynshai ka MPSC kaba mih ha ki lad pathai khubor ha u 26.07.2024 ban pynksan ia ki jingleh thurmur jong la jong khlem da sngewkhia ba ki lehkai bad ka jingim ki samla jong ka jylla.
Ka Seng, ka la dawa na ka MPSC ba kan pynlait paidbah ia ki mark jong baroh kiba ialeh ia ka MCS (prelims) examination khnang ba ki nongialeh eksamin bad ban thung ia ka “Independent Inquiry” ha kaba iadei bad kane ka bynta.
Ka la dawa ruh ban pynshai halor ka jingduna ki samla kiba shah jied ha ka personal interview jong ka MPS. Katkum ka advertisement jong ka MPSC, ka pyni ba yn jied ia ki samla sha ka personal interview katkum ka ratio 1:10 haduh 1:2.5 na ka kam kaba lait. Namar ba la pyllait ia 17 tylli ki kam ha u snem 2019, kaba duna tam ban shah jied ha ka personal interview kan dei 42 ne 43 ngut, hynrei la iohi ba ki jied tang 27 ngut ba kane ka la pynkheiñ ia ka kyndon kaba ka MPSC kaba lah buh. Ka Seng ka buh ka dak jingkylli ba shaei kita ki 15-16 ngut ki samla ki jah bad kim shim lah mih kyrteng na bynta ka personal interview