SHILLONG, 4 Jylliew: U Myntri Rangbah ka jylla, u Conrad K Sangma, u la pynthikna ba ka jingshah pyniap uwei u nongjngohkai na Indore ka la wanrah ka jingsngewkhia kaba jur, khamtam ha ka jylla Meghalaya kaba ju tip kum ka jylla kaba ieid briew bad kyrkhu paidbah ia ki nongwan jngohkai pyrthei. Haba ai jingkren sha ki lad pathai khubor ha ka sngi Balang, u la ong ba ka sorkar kan pynshisha ba ka hok kan ioh bad ba ki briew kiba donkti kin shah pynngat ha ka aiñ.
U Sangma u la ong, “Ka Meghalaya ka dei ka jylla kaba ju pynpaw ia ka jingieit bad ka jing kmen jong ki paidbah ïa ki nongwan jngohkai. Ym don ba la khmih lynti ba kaei kaei kum kane ka jingjia kan sa jia ha ka jylla kaba ju pdiang sngewbha ïa ki spah spah ngut ki nongwan jngohkai man ka snem bad kaba khlem ju don kino kino ki jingjia ba sngewsih.”
“Ngi dang trei shitom ban wad ïa ka jingshisha halor kata ka jingjia. Ym pat shai eiei halor ka jingïaid lynti jong kane ka jingjia,” la ong u CM, bad pynpaw ruh ka jingsngewkhia kaba jur.
U la ong ruh ba baroh ki paidbah bad ki kynhun treilang ki la ïasnohkti ban pynioh jingshai halor ka jingïap jong u shynrang bad ka jingjah rngai jong ka kynthei bad u la kular ruh ba ka sorkar kan ym ieh eiei, kan pynlong lut ïa ka jingtohkit ban lap thikna ïa ka jingshisha.
Haba kylli la ka sorkar ka dei ban phah tohkit da ka CBI, u Sangma u la jubab, “Ka jingshisha ka hap ban mih shakhmat. Ngi dei ban lap ïa ka jingshisha da shisha. Da mynta, ka dang kloi palat ban ong eiei namar bun ki bynta ki dang klumar. Hynrei, la ka long kaei kaei ruh, ngin leh lut kaei kaba donkam ban pynshitom ïa kiba donkti ha kane.”
“Ngin pynthikna ba ka hok kan ioh,” u la bynrap. U pynpaw ruh ba kane ka jingjia ka lah ban buh kaei kaei ha ka dur jong ka jylla, hynrei u pyntikna ba ka Meghalaya ka dei ka jylla kaba ieid ïa ki nongwan jngohkai bad ki paidbah ruh ki long kiba pdiang sngewbha.
CCTV ban buh ha ki jaka jngohkai
Ha ka jingpyrshang ban pynkhlain ïa ka jingshngaiñ ha ki jaka jngohkai, ka sorkar jylla ka la rai ban buh CCTV ha ki jaka ba bun ki nongwan jngohkai. U CM u la ong ba la estimate ba la donkam palat 1,000 tylli ki CCTV ha kylleng ki jaka jngohkai, hynrei ka long kaba eh namar bun na kitei ki jaka ki hap ha ka jingpeit jong ki shnong bad ki seng saiñ pyrthei bad ki riew paidbah.