Kyntait ka BJP ia ka Jingkynnoh u Nongialam VPP ba ka Sorkar Pdeng ka Leh Shiliang Khmat.

Shillong 7/01/2025: Ka Meghalaya unit jong ka BJP ka la kyntait ia ka jingkynnoh u nongialam ka VPP u Ardent Miller Basaiawmoit ba ka Sorkar Pdeng ka la pdiang ia ka rukom leh “shiliang khmat” (step-motherly) ia ka jylla.
U spokesperson ka BJP u Mariahom Kharkrang u la ong ba wat la u MLA ka VPP u la kdew ia ki katto katne ki mat ha kaba lah ban don ka jingmynjur, hynrei ka jingkynnoh halor ka jingleh shiliang da ka sorkar pdeng ka long kaba “bym dei bad kaba ym lah ban pdiang.”
U Kharkrang u la kdew ia ka jingkren u Basaiawmoit ba ka Meghalaya ka la jah noh lai tylli ki lad ban long ka jylla kaba ha khlieh tam bad u la ong ba wat la ki don ki jingsngew kiba la pynpaw kiba dei, hynrei kiwei pat ki long kiba la pynbakla ia ka jingshisha.
U la pynshai ba ka Article 371 ka dei dkhot jong ka ain iada (protectionist safeguard) ia ki jylla kiba rit paitbah kum ka Meghalaya, Ki kyndon iada kum ka Article 371 ne ka Sixth Schedule hi ki ym lah ban pyniaid ia ka roi ka par,” u la ong.
Halor ka kam jaka ba ianieh hapdeng ka Meghalaya bad ka Assam, u la ong ba wat lada la pynbeit ia kine ki jingiakajia naduh mynshwa, ka roi ka par kan long tang ha kito ki jaka kiba don hapdeng ka jingiakajia bad ym ha ka jylla baroh kawei. U la kynnoh ba kine ki kam pud kim shym la pynthut haduh katta ia ka lynti iaid ka roi ka par ha Meghalaya.
U Kharkrang, wat la katta, u la mynjur bad u Basaiawmoit ba wat la ka Meghalaya ka pahuh ha ki marpoh, kine ki marpoh kim shym la wallam ia ka roi ka par kaba donnum ia ka jylla.
U spokesperson ka BJP u la ong ba ka jingsynshar kaba khuid ka dei kaba donkam tam, da kaba ong ba khlem ka jingshai bad ka jingsynshar kaba paka, ka roi ka par kaba iaineh ka jwat ban ioh.
Haba kyntait ia ka jingkynnoh halor ka jingleh shiliang khmat, u Kharkrang u la ong ba ka Sorkar Pdeng ka la ai ka jingkyrshan kaba khraw ia ka Meghalaya lyngba ki scheme bapher bapher bad ki jingpynlut pisa.
U la ong ba wat la ka BJP kam dei kaba ialam ia ka sorkar jylla bad ka dei tang kawei ka bynta jong ka, hynrei ka Sorkar Pdeng ka la kyrshan barabor ia ki kam pynroi ha ka jylla. “Ka Sorkar Pdeng kam lah ban leh bor ia ka roi ka par ha ka jylla. Ka jingsdang ka dei ban wan na ka sorkar jylla, nangta ka Sorkar Pdeng kan sa shimti ban pyniaid shakhmat,” u la ong.
Haba kren halor ki jingsngew bit hapoh ki ain iada, u Kharkrang u la kdew ba ka Meghalaya ka la don lypa ki lad iada kiba bun, kynthup ia ki ain pynkynriah jaka. Ka jingeh kaba shisha, u la ong, ka shong ha ka jingtreikam kaba paka. U la maham ba wat ki lad iada kum ka Inner Line Permit ki lah ban nym treikam lada don ki thliew liewlyngngad, ka bamsap, ne ka jingtreikam kaba tlot.
U Kharkrang u la kyntait ia ka jingkynnoh ba ka Sorkar Pdeng kam sngewthuh ia ka dustur bad ki ain riti kiba kyrpang jong ka Meghalayada kaba kdew ia ka jingmap (exemption) ia ki jaka Sixth Schedule hapoh ka ain Citizenship Amendment Act (CAA).. “Ki nongialam ha Delhi ki tip bha ia ka jinglong bapher bapher bad ki jinglong kiba donkam ban sngewthuh halor ki jylla kum ka Meghalaya,” u la ong.
Halor ki kam iada ia ki kynthei bad ki hok jong ki rit-paitbah, u nongialam ka BJP u la pynshai ba ka Sixth Schedule bad ki ain pynkynriah jaka ki la ai lypa ia ki lad iada.
U la ong ba ka jingshngain ka khappud kaba dei bad ka ri bar ka dei ka kam kaba donkam tam, da kaba ong ba ka jingwan rung tuh na shiliang khappud ka dei ka jingma kaba khraw tam ban ia ki kam kiba mih na poh ka ri. U la bynrap ba ki jingpyrshang jong ka Sorkar Pdeng ban ker ia u pud u sam ka la iakynduh ia ki jingeh kio ba bunsien .
U Kharkrang u la kdew ba ym don kawei ruh ka kam ka Sorkar Pdeng kaba la leh pyrshah ia ka dustur ne ka hok ha ka khyndew ka shyiap jong ka Meghalaya, da kaba ai nuksa ia ka railway project kaba ka Sorkar Pdeng ka la burom ia ki jingsngew jong ki briew jong ka thain bad ka la pynsangeh ia ka jingtreikam tad ynda la ioh ia ka jingmynjur lang.
Shuh shuh u la ong ba ki scheme jong ka Sorkar Pdeng kiba la ai jingmyntoi ia ka jylla, kynthup ia ka Pradhan Mantri Awas Yojana, Ujjwala Yojana, scholarships ia ki samla pule kiba duk, ki skill development programmes bad ki Mudra loans ia ki nongseng kam kiba rit.
U la ong ba bun ki briew kim pat ioh ia kine ki jingmyntoi namar ka jingbym tip bad u la kyntu ia ki nongmihkhmat paitbah ban pynshai ia ki briew halor kine ki kam.
U la pynkut da kaba ong ba ka jingkynnoh ia ka Sorkar Pdeng halor ki jingeh ka roi ka par ha Meghalaya ka long kaba bakla bad u la pynshai ba ka jingsynshar kaba paka, ka jingpyntreikam kaba dei ia ki lad iada, bad ka jingshim khia na ka sorkar jylla ki dei ki lad ki lynti halor ka roi ka par ka jylla.