Shillong, 31 Naitung 2025
U Dr. Mukul Sangma, u Nongïalam ka Liang Pyrshah bad MLA ka Songsak, u la ther tyngeh ïa ka Sorkar Meghalaya Democratic Alliance (MDA) kaba ïalam da u Conrad K. Sangma, halor ka jingsniew ka rukom pynïaid ïa ka Garo Hills Autonomous District Council (GHADC).
U Dr. Mukul u kynnoh ba ka Sorkar MDA ka la pynkhein jubor ïa ki Autonomous District Council (ADC) lyngba ka jingbym ai pisa, bad ka jingbym pyntrei ïa ka Meghalaya State Finance Commission Act, 2012 kaba dei ban pynkup bor bad ai jingkyrshan pisa ïa ki Council.
Ha ka jingïakren bad ki lad pathai khubor, u Dr. Mukul u la pynpaw ba haduh 42 bnai ki nongtrei ka GHADC kim pat ioh tulop, kaba la wanrah jingshah thngan bad eh ka imlang sahlang. U la ong ruh ba ka sorkar ka la leh mynthi halor ka case jong ka Lokayukta, kaba ïadei bad ka jingkynnoh pynkheiñ pisa haduh T.100.71 klur tyngka, ba la mang na ka sorkar pdeng ha u snem 2015-16.
“Ka sorkar ka don ka jingthmu ban pynjulor pura ïa ki District Council da kaba pynkhein bad leh mynthi ïa ki kyndon aiñ. Kane ka pyni ba ka MDA ka kwah ban pynduh ïa ka bor synshar jong ki riewlum hapoh ka Sixth Schedule,” la ong u Dr. Mukul.
U la dawa ruh ïa ka sorkar pdeng ban pyntrei noh ïa ka jingpynkylla ïa ka Sixth Schedule, kaba dei ka bynta jong ka jingkular ha ka ANVC peace settlement ha u snem 2014, hynrei kaba sahkut haduh mynta.
U Dr. Mukul u la ong ba dei ban ai noh mardor ïa ki tulop jong ki nongtrei GHADC bad ban pynlong ïa ka District Council kum ka tnat synshar kaba laitluid bad kaba lah ban ai jingshakri hok sha u paidbah ha Garo Hills.