Shillong, Lber 11: “Ha ki snem ban wan, kan long ka por kaba kongsan na ka bynta ka jylla bad ki paidbah namar ka Ka New Shillong Township kaba kynthup ia ka “Knowledge City and the Administrative City” la dep ban bhah pisa T.10 000 Klur lyngba ka Mang Tyngka na ka bynta ban kyntiew ia ka roi ka par, kaban plie lad ban aikam aijam ha ki kam kiba thymmai kaban kot 50,000 tylli” iathuh u Myntri Rangbah u Conrad K Sangma ha ka jingialang mawnongrim ban tei ia ki 3 tylli ki projek kiba kynthup ia ka New Shillong Water Supply Scheme,kaba kot T. 1600 Klur kadei kawei na kiba heh tam ka projek kaba ka sorkar kala bhah tyngka. ka Land Reclamation Project ha ka Waste Processing and Disposal Site ha Marten Mawlai bad ka jingtei ia ka surok hapoh ka New Shillong Township ha Mawkhanu, Mawpdang.
Ha katei ka jingialang kaba la long ha Mawkhanu, Mawpdang la iadonlang u Symbud Myntri Rangbah ka jylla Bah Sniawbhalang Dhar, u Myntri ka tnad PHE u Marcuise Marak, ka Myntri ka koit ka khiah ka Dr. Ampareen Lyngdoh bad u Chief Secretary ka jylla u D.P Wahlang.
Ka New Shillong Water Supply Scheme kan pynbiang um na ka bynta ka Nongbah Shillong bad New Shillong Township kynthup ia ki jaka pule, ophis treikam bad ki 32 tylli ki shnong kiba don kumba 29,889 ngut. Kane ka jingthmu ka dei ruh da kaba buh jingmut lypa ban pynbiang um ia ki 198,997 ngut ki briew ha u snem 2042 bad 413,701 ngut ki paidbah ha u snem 2057.
Ha ka jingshna ia ki surok shnong ha New Shillong Township, u Myntri Rangbah ula ong ba la shna ia ki surok ha Mawkhanu ha ka jinglut T.185 Klur.
Ula pyntip ruh ia ka jongshna ia kiwei kiwei ki surok hapoh ka New Shillong Township ban pynsuk ia ka leit ka wan, kiba kot T. 343 klur bad kine ki kynthup ia ka surok na Ummir sha Mawkhanu bad Kynoton sha Lyngkien, Bellefonte sha New Township, Diengpasoh Road sha Shillong Bypass bad na Bribah Mawpat sha New Township.
Ha ka wat ka Baar jong ki surok, ka surok ba 16.6 Km ba heh 15 Meter bad ka surok 2 lane ba 3.2 Km ba heh 7.5 M la tyrwa ha ka jinglut jingsep kaba T.185 Klur. Ia kitei ki surok la khmih lynti ban pyndep hapoh u snem 2026.