La i Sangsot ia ki Nongdie madan bapli ha Khyndai lad. Babu Kular Khongjirem. Lada ngim ia peit ia ki dur ha ki Social Media ruh ym lah shah,lada peit ruh la i sangsot pynban hi khait ia ki Nongdie madan(hawkers) bapli ba ki la shah kyndang jubor ha ki bor sorkar ba donbor.Ki jingiakhun jongki ym dei shuh da ka nia ne da ka ktien ne da lynti jong ka Hok ne da ka lynti jong ka ain,hynrei katkum ka jingkhlain bor(force).Imat,lah poi biang ka por hangne ha ri jongngi kumba long ka juk hyndai ba kat kiba kham khlain bor,,kata,kita ki kynhun ki long beit ki nongjop ia ka Hok ( might is right) ia kano kano ka kam.Kajuh ka jingjia ia ki nongdie madan,ba ki bor ba kham donbor, ki jop bad leh donbor katba mon ia kiba kham tlot.Kam don shuh ka jingiatip lem( social conscience).Kam don shuh hi ruh ka jingpyrkhat sngewlem para briew(humaniterian feeling) hynrei ki nion beit naphang da ka bor ban pynkhein bad iuhroit ia ka Hok longbriew man briew( a violation of human right) khamtam ha kaba iadei bad ka lad ban ia kamai kajih kyndoi jakpoh(right to earn their daily living) jong ki briew ha kane ka pyrthei shong basa shipor. Ha ka jingshisha,katkum ka Riti Synshar ka ri India(Constitution of India), ka ri India bad ki state jongngi ki dei ban bud ia ka riti synshar paidbah(democratic principles).Hynrei,haba peit ia ka jingleh jong ki bor sorkar ia ki nongdie madan(hawkers) bapli ha Khyndai lad(police bazar), i kumba ka state Meghalaya kam dei shuh ka state synshar paidbah(elected goverment) hynrei i kumba ka dei ka police state pynban.Ka rukom leh donbor kam da iapher than bad ka rukom leh ha ka por ba synshar u Hitler hyndai.Kumno kita ki Nongmih khmat paidbah(MLA/MDC) kiba jied u paidbah kiba ju mlien ban kular man ka por elekshon ban leh bha bad ban iada ia ka hok ki paidbah,ban peit lem ruh ia ka bha ka miat u paidbah,kin phah nion bein ia ki duk ki suk,ki rangli ki juki kiba ju kamai rwing kyndoi jakpoh(daily bread earners) kiba pli man ka sngi ban pyndap ia ka pliang ja jong ka ing ka sem jongki, ki buh skul ruh ia la ki khun na ine i kamai kyndoi jakpoh jongki.Hato! Kine ki nongmihkhmat paidbah ki matlah l ban shu ia peitkai ia ka apot sepngi ba kine ki rangli ki ia kynduh ia kum kane ki apot,ka shempap bad ka lanot ba ki ia kynduh ha ka jingim jong kine ki nongdie madan kiba pli?Ki kular(oath of taking) thik thik kum ki MLA/MDC ,khamtam kum ki Minister wat hakhmat U Blei(in the name of God) ba kin bat ban shakri hok(uphold) ia ki paidbah katkum ka Constitution,hynrei ynda ki la don pat ha ka bor kim salia ia ka kular hok ba ki la khlei bad ki leh bein pynban da kumwei pat,Kynmaw bha,ka MLA Elekshon 2028 kam jngai shuh ba u paidbah un ioh bishar biang ia la ki jong ki nongmihkhmat(MLA/MDC) ba ki la pynjop donburom ia ki ha kane ka sien kaba la dep(last election). Ha ki nongsynshar kiba stad, kiba shemphang, lada ki leh ne plan ia kano kano ka kam ka bym pynhun satia ia ki paidbah, ne lada kata ka plan ne policy jong ki, kam ia hap satia ia ka jingmynjur(ageement) lang jong ki paidbah,ki nongsynshar kiba tbit, ki ju wad noh da kiwei pat ki lad ki lynti(find out ways and means), ne ki wad noh da kiwei pat ki buit(find out other altenatives) khnang ban ia hunlang ne ioh ka jingmynjur lang bad ki paidbah kiba don bynta(stake holders) ha kata ka kam(issues).Hynrei,ki nongsynshar jongngi pat kim pat kot bor satia ban thaw buit kumta.Tang namar bym kohnguh ki nongdie madan(hawkers) ban kynriah noh (shift) sha jaka ba la buh ka sorkar(namar ym don jingphoida lada ki leit shata),tang kumta ki la sdang ban pynkynriah noh da ka bor(force).Lada leh da ka bor,uba khlain bor te,u jop beit ia ka Hok(might is right). Ngi dei ban kynmaw ia ka jingsneng ba “Lada phi leh bein ia uba tlot,phin liem ha uba kham khlain bor ha kawei ka sngi”.Kynmaw ruh ba,ka nongkylliang kaba kham sniew ka ap ban snoh ha piew”(kham sniew ne kham shyrkhei hapoh) ia kito ki nongleh bein leh khoh ia kiba tlot.Ka Hok kan sa bishar bad ai jingsneng ia kita kiba leh bein ne leh khoh ha kawei ka sngi.”Kiba leh bein leh khoh,kin kit u bsein shi khoh”.Lada ka bor briew(human power) ka jop da ka bor(force), ki bor ba sha lyndet(super natural power) ki ap lypa ban ai jingsneng bad ai nongkylliang ym tang iaphi uba leh bein bad leh donbor ia kiba rit kiba tlot hynrei ka ap lypa ruh ban ai jingsneng wat ia ka ing ka sem jongphi, ia ki khun ki pyrsa jongphi hadien ha bud.Lada ka jia kumta,wat babe ne sngewrem shuh da kumwei pat.Phin nym shan ka jing don lak jingdon klur jongphi ban pynkoit ia ka bai nong lehbein briew ha kane ka pyrthei. Wat u Ramhah ruh u kyllon hi jrain hadien ba u leh bein leh khoh bad lute naphang lin ia ka Hok jong ki paidbah nong iew nong hat ha kito ki por. Namarkata,husiar bha kaba leh donbor,kaba leh bein leh khoh ia kiwei kiba tlot, ki rangli ki juki ioh ba phi dang dei lem u briew,(ym dei U Blei),kan sa wan jia kylla lem ka apot kaba kham shyrkhei haphi,ne ha ka ing ka sem ne wat ha ki khun ki pyrsa jongphi ha ki khyndiat snem kiban wan.Lada ka wan jia shisha kumta ha ka ing ka sem bad ha ki khun ki ksiew jingphi,wat babe kylla ne sngew rem shuh da kumwei pat namar ba phi la leh bein leh khoh ia kiwei pat.
