Shillong, 4 Lber: Ka Meghalaya State Unit jong ka National People’s Party (NPP) ha ka sngi Balang ka la kynmaw burom ïa ka jingdap 10 snem ka jingkhlad jong u nongthaw bad nongialam ba hakhmat eh jong ka, u (L) Purno Agitok Sangma, ha ka jingïalang kaba la long ha State Headquarters jong ka party ha Polo, Shillong.
U President ka NPP jylla u Bah Prestone Tynsong, u la ialam ïa ki dkhot ka seng ha ka jingbuh syntiew bad jingïaroh ïa ka jingnoh synñiang bakhraw jong u Purno Sangma na ka bynta ka Meghalaya bad ki jaitbynriew riewlum ha ka thaiñ Shatei Lammihngi.
Haba ai jingkren sha ki nongtrei seng, u Tynsong u la pynpaw ïa ka jingsngewsih hynrei ka jingkmen ruh da kaba ong ba u Purno Sangma u dei u nongialam uba la “jied da U Blei,” uba ju buh hakhmat eh ïa ka bha ka miat jong ki riewlum ha ka ri baroh kawei.
U la kynmaw ïa ka jingïadei ba jan eh jong u bad u Purno Sangma, khamtam ha ki snem kumba 2014 haba u la shah jied biang kum u MP na Tura. U Tynsong u la ong ba man ka por ba u leit sha Delhi, u ju phone ïa u Sangma bad leit jngoh ïa u ha iing sah jong u ha ka por mynmiet.
“Man ka por ba nga poi Delhi, nga ju phone ïa u. Nga sah ha Meghalaya House, bad kumba 8:30 ne 9 baje mynmiet nga leit jar jar sha iing jong u. Wat u James Sangma ruh um tip haduh katno ngi la jan,” ong u Tynsong.
U la bynrap ba kane ka jingïadei jong ki ka la wanrah ruh ïa ki jingkynthoh na ka jingïalam ka Congress ha kato ka por.
Katkum ka jingïathuh jong u Tynsong, u Purno Sangma u la ju ong ha u:
“Me kum u para rit jong nga. Trei shitom bad pynthikna ba ka hok jong ki riewlum — na Meghalaya, na Shatei Lammihngi bad na ka ri India baroh kawei — ka dei ban shah iada.”
U Tynsong u la ong ba ha kato ka por u la pyrkhat ba ka jingshakri jong u kan neh tang hapoh jylla, hynrei ka jingïakynduh bad jingïadei bad u Purno Sangma ka la pynkylla ïa ka jingmut jong u ban don bynta ha ka thong kaba kham heh.
U Tynsong u la ong ba ka khubor jong u Purno Sangma — “One North East, One Voice for Tribals in India” — ka la nang shai bha ha u hadien ba u la pule ïa ka constitution jong ka NPP ha u snem 2018.
U la ban jur ba ka jingiada ïa ka jingïalong kyrpang jong ki jaitbynriew, ki hok kiba la ai da ka riti synshar bad ki hok ki trai ri trai muluk dei ban long hakhmat duh jong ka party.
“Ngi ym lah shuh ban ioh ïa u nongialam kum ma u. Ka pynsngewpang ïa nga haba don kiba kynthoh ïa ka constitution jong ka party. Kum ki minority, ngi dei ban iada ïa ka thong ba u la ieh ha ngi,” ong u Tynsong.
U la ong ruh, “To ngin sakhi ba ki jingkyrkhu lyngba ka NPP kin poi sha ka ri baroh kawei.”
U National Working President ka NPP bad myntri barim ka tnad Home, u James K Sangma, u la ai ka burom kaba khraw ïa u kpa jong u, da kaba ong ba ka jingkynmaw kaba shisha kam dei tang ka jingkynmaw hynrei ka dei ka jingbteng ïa ka thong jong u.
“Ka jingkynmaw kaba shisha ïa u nongialam kam dei tang ka jingkynmaw, hynrei ka jingbteng ïa ka thong jong u. Ka jingpynskhem ïa ka thong jong u lyngba ka NPP ka don ka bor bad ka jingiaid shaphrang namar ka nongrim kaba skhem ba u la buh,” ong u.