Shillong, Jylliew 2: Ki Pulit ka jylla ki la pynshisha ba ia ka met jong u briew, kaba la lap ha step sngi Nyngkong na kawei ka Jynrah kaba jrong ha shnong Sohra hajan Kshaid Weisawdong , la ithuh ba kadei jong u Raja Raghuvanshi, uwei na ki ar ngut ki nongjngohkai na Indore, Madhya Pradesh, kiba la jah rngai. Ka jingwad ïa ka tnga jong u, Sonam, dang bteng ha ka jaka kaba khlaiñ shibun ka jingeh.
La lap ïa ka met iap ha ka por mynstep da ki kynhun Pulit bad ki SDRF kiba treishitom ban pynlong ïa ka jingwad da ki taiew.
Na ka liang kiba Bahaiing ki la pynshisha, bad la ithuh ba kadei hi ka met iap jong u Raja.
Na ki tyllong jong ki pulit ha kaba Uwei u heh pulit u la ong ba la pyndonkam ruh da drone ban lap ïa ka met iap kaba don ha ka Jynrah kaba jrong bha.
Ka jingiaid lynti ban wad ia kitei ki shijur hadien u Jymmang 22, 2025: U Raja bad ka Sonam Raghuvanshi ki la poi ha shnong Mawlakhiat (Elaka Mynteng) da ka scooty kaba ki la shna rent. Ki don jingthmu ban leit jngoh ïa ka Double Decker Root Bridge ha Nongriat bad ki la shong ha Shipara Homestay, bad la synñiang da u nongpynïaid lynti shnong, Bah Wansai.
Hadien kane ka 23, tarik , por 6:00 AM: Ki khubor ki batai ba ka tnga bad u lok ki la mih na Nongriat ban leit phai sha Mawlakhiat. Hynrei haduh mynta ym shym la lap satia ïa ka dak ka phong jong ki ha ka lynti, lane ba la shim noh ïa ka scooty na Mawlakhiat, watla ka thain ka don ka jingdon briew bha. Ha ka 24, por 9 baje mynmiet U Sordar ka Sohrarim u la pyntip ba la lap ïa ka scooty kaba la iehnoh. La ioh pynshisha ba kadei jong ki briew ba jah lyngba ka E-Challan ha ka 25 tarik ha ka por 2:30 PM. Hadien kata, ki paralok ki la mudui da ka FIR.
Jymmang 28: La sdang noh ïa ka jingwad kaba khlaiñ bha da ki 50 ngut eiei ki briew, ki 3 kynhun kyrpang ba kynthup K9 units, ki drone na NESAC, bad ki dkhot jong ka Special Operations Team (SOT) bad ki paidbah shnong. La pynlong ïa ka jingwad ha ki jaka ba kynthup Nongriat-Pyndemdkhar-Mawlakhiat, Mawsahew-Wahkaliar bad Weisawdong.
Hadien ba la ithuh ïa ka met iap jong u Raja Raghuvanshi, baroh ki bor ba don ha ka jylla ki la pynkhlaiñ kyrkieh ïa ka jingwad ka Sonam, kaba dang jah haduh mynta.