Shillong 12 Jymmang – Ka 12 tarik u Jymmang ka Kong RM Kubah ka Deputy Commissioner ka East Khasi Hills ka pynpaw ka jingsngewkhia ia ki paid samla ka jylla Meghalaya namar ka kyrduh kam kyrduh jam.
Na ka liang ka Deputy Commissioner ka la pynbna ba na ka liang ka ophis kan iarap ia ki samla thep kam Shipai da kaba kin ai da ka jinghikai ne ka Pre Recruitment Coaching bad ka Training na ka bynta ki samla kiba thep kam shipai lyngba ka Agniveer ha ka Indian Army ka ban sa long ha kine ki sngi ki ban wan ha ophis jong ka deputy Commissioner.
ka Kong RM Kurbah ka la ong ba ka Ophis ka kwah ban iarap ia kito ki samla kiba kiba thep kam shipai ban wan sha khmat sha ka jingai jinghikai ka ban long kumba 30 haduh 45 sngi.
U Bah Sebastian Marbaniang u shipai ba la shongthait u sngew bynñiaw ia ki samla khasi ba kim wan shakhmat ban leit rung sha ka kam shipai namar ka jingkhohñioh ki kmie ki kpa bad ka jingbym ai mynsiem jong ki ia ki khub.
U Bah Marbaniang u kyntu ia ki samla ban mih sha khmat ban ia khun ia kane ka kam, ka ban long ka jingmyntoi shibun na ka bynta ka jong ki. Une u Rangbah u la iathuh ba ki samla kiba 17 snem shiteng haduh 21 snem ki lah ban thep ia kane ka kam shipai bad hadien ba ki ioh ban trei ha kane ka kam shibun ki jingmyntoi kin ioh ym tang ka tulop kaba ki ioh hynrei ki wei ki wei de ki jingmyntoi. U la ong ba ha kane ka kam ka don shibun ki bynta.
U Bah Shanborlang Warjri, ADC u la ong ia ki samla ban wan register ha DC ophis ha ka kamra 319 haba iadei bad kane ka kam shipai Agniveer bad ka ophis jong ka DC kan sa pyntip haba iadei bad kino kino ki kam ba lait haba iadei bad ki kam shipai lyngba ka Massage ne ka Whatsapp.