Shillong, 7 Nailar:
U Myntri Rangbah ka jylla, u Conrad K. Sangma, u la pynpaw ba lada ka Ri Khasi Jaiñtia kam treh ban pdiang ïa ka lynti rel, ka sorkar kan sa pynkynriah noh ïa katei ka projek sha ki bynta ka Garo Hills. U la kren ïa kane ha ka jingïakren bad ki lad pathai khubor hadien ka jingïalang Cabinet ha Iingsah jong u ha Shillong.
“Ka sorkar kam shym la thmu ban pynbor, hynrei lada ka Ri Khasi Jaiñtia kam mynjur, ka jingpynpoi ïa ka rel kan sa leit sha ka Garo Hills,” ong u Conrad K. Sangma.
U la pynshai ruh ba ka sorkar pdeng ka la buh ka thong ban kyntiew ïa ka rel ha ki jylla ka thaiñ shatei lam mihngi bad ka Meghalaya ka la ioh ïa ka bynta jong ka. Hynrei, ka jingïakhih pyrshah kaba la wan na ki paidbah ha ki snem bala leit ka la pynsangeh shipor ïa ka jingpynurlong.
U Conrad u la ong ba ka sorkar ka dang trei borbah ban pyntip sha ki paidbah halor ki jingmyntoi jong ka lynti rel kum ka lad ban kyntiew ïa ka ioh ka kot bad ka kit ka bah.
Kumba ka long mynta, ka rai ka shong ha ka jingïasngewthuh bad ka jingïatreilang jong ki paidbah bad ki bor synshar shnong,” bynrap shuh shuh u Myntri Rangbah.