BHUTAN : Myntri Rangbahduh ka ri india u Narendra Modi, u la leit ban ïakynduh ïa u Syiem ba saw bad barim jong ka Bhutan u Druk Gyalpo Jigme Singye Wangchuck, bad hadien ki la plie lang ïa ka jingïalang pynkupbor ïa ka Kalachakra ha Thimphu, ha kajuh ka por kum ka dak jong ka jingïadei kaba jan bha bad ka kolshor hapdeng kine ki ar tylli ki ri.
Ka Kalachakra, ka dei kawei na ki jingleh niam ba kyntang bad ba bniah tam jong ka niam Buddhist Tibet, la rakhe kum ka jinglehniam ai bor kaba lai sngi, kaba ai jingkyrkhu bad ai bor na ka bynta ki rukom pyrkhat ba kham shajrong bad ka jingshai ki pateng la pateng
Kane ka jingpan bor ka long shi bynta jong ka Global Peace Prayer Festival 2025, kaba la pynlong da ka Sorkar Syiem Bhutan naduh ka 4 tarik unovember haduh ka 17 tarik u bnai vovember
U Myntri Rangbahduh un don ha ka ri Himalaya naduh ka 11 tarik haduh ka 12 tarik u November, ha kaba un leit sha ki katto katne ki prokram bad un ïashim bynta ha ka Global Peace Prayer Festival. Un ïashim bynta ruh ha ka jingrakhe ïa ka jingdap 70 snem jong u syiem ba saw jong ka ri
Ka Jingduwai Jingsuk ha ka Pyrthei ka dei ka jingïalang ba kynja mynsiem kaba pawnam kaba pynïasoh lang ïa ki nongïalam Buddhist, ki nongleh niam, bad ki nongïalam ïa ka jingsuk na kylleng ka pyrthei.
Ia kane ka jinglehniam yn sdang bad ai bor ia ka Kalachakra bad yn pyniaid da u Je Khenpo, uba dei u nongialam niam jong ka ri Bhutan.
Kham ha shwa jong kane kata ha kaba ar, u Myntri Rangbah duh u Modi u la pynlong ïa ki jingïakren ba kyrpang bad u Syiem jong ka Bhutan u Jigme Khesar Namgyel Wangchuck halor kiba bun ki bynta kum ka bor ding, ka jingiada ri, bad ka teknoloji.
U Narendra Modi u la iaroh ia kane ka jingialang, da kaba ong ba ka kynthup lut ia ka jingiadei hapdeng kine ki ar tylli ki ri.
ka jingiakynduh kaba sngewtynnad bha bad u Syiem jong ka Ri Bhutan. Ngi la kdew lut ia ka jingiadei hapdeng ka India bad ka Bhutan. Ngi la iakren ia ka jingiatreilang ha ki bynta kum ka bor ding, ka jingpynroi ia ka bor, ka jingpyniasoh, ka teknoloji, ka jingiada bad ka jingshngain. Ka India ka sngew sarong ban long ka paralok ba kongsan ha ka jingïaid lynti jong ka roi ka par jong ka Bhutan,” la ong U Modi ha ka jingthoh kaba u la pyllait hapoh ka rynsan X
Ryngkat bad u Syiem Jigme Khesar Namgyel Wangchuck, u PM Modi u la plie ruh ïa ka Punatsangchhu-II Hydropower Project bad u la khot ïa ka kum ka “Symbol kaba neh” jong ka jingïadei paralok hapdeng ka New Delhi bad ka Thimpu.