Shillong -Lber 16: – Ki ar tylli ki Parliamentary Seat ha Jylla Meghalaya ka Shillong, bad ka Tura Seat ki dei kiba la buh bhah ia ki Schedule Tribe (ST) Napdeng ki 543 tylli ki parliamentary constutency ha Lok Sabha, 47 tylli ki seat ki dei kiba la buh bhah ia ki Schedule Tribe (ST) bad 84 tylli la buh bhah ia ki Scheduled Caste (SC).
Na ka liang u Dr.B.K.Tiwari ri Chief Electoral Officer u iathuh ka Election Commission ka Ri India kala pynbna baka elekshon Lok Sabha ba 18 jong ka Ri, kan long ha ki hynniew tylli ki phase. Ki Jylla ka thain Shatei Lam Mihngi kin thep vote ha ka phase ba nyngkong, ha ryngkat ki Jylla ba Shathie ka Ri ha ka 19 tarik u Iaiong.
Ka jingthep vote jong ki 97 klur ngut ki nongtheo vote kan long ha baroh ki Jylla ka Ri, ha ki 10.5 lak tylli ki Polling Station. Haduh 22 lak 17 hajar 100 ngut ki nongthep ha Jylla Meghalaya.
U Chief Election Officer ka Jylla u Dr. B.K Tiwari kumjuh wat ka ECI CEC ula ong ba kane ka tamasa ka riti synshar paidbah kan long ha manla ki kyndong kynshrot jong ka Ri. Ka ECI kala shim ia baroh ki sienjam kiba donkam ban pynthikna ba ka jingpyniaid ia ka elekshon kan long kaba khuid bad ka bym shah liang. “Ngin poi lut sha manla ki jaka, la ka dei ki lum, ki jaka ba sop thap, lane ha pdeng jong ka khlaw, khnang ba ki nongthep vote jong ngin kin ym mad ia ki jingeh” ong u Kumar
Ula pyntip ruh ba yn pyndonkam pura ia ki kor technology ban pdiang ia ki jingujor, ban ai jingbit lane ban register ia ki jingud jingnam.
Haba pyntip ka ECI kala wanrah ia ki lad treikam ban tehlakam ia ka pisa, ka ksah bad ka jingpynsaphriang khubor lamler.
“La dep btah ia ki jingbtheh sha ki bor khmih ba kin tehlakam ia ki kam ba iaid ha ka lynti ka ba bakla. Ngin peit pyrman ia ka jingsam ia ki jingai sngewbha, ka kyiad bad ka jingpynthep pisa online” ula bynrap.
Ki Bank kin ai kaiphod sha ka ECI manla ka sngi ban pyntip ia kino kino ki jingiathep iasei pisa ba I shankhmat, ula ong.
Ka ECI Kumar ka la maham ruh ia ki seng sain pyrthei ba kim dei ban iaid ialap elekshon da kaba kynthoh shimet hynrei ban ialap halor ki ishu bad ki nongrim. Kala maham ruh ba ym dei ban pyndonkam ia ki Khynnah ha kano kano ka rukom ha ka por ialap elekshon. ula kdew ba ki khubor lamler bad jingpynsaphriang khubor thok, ki dei ki kam ba sngewkhia bha da ka Election Commission bad kane kala jureh naduh ka jingmih jong ki social media.
Kala maham ruh ia ki nongshna ia ki khubor lamler ba kin shah pynsajia da kaba tyngeh kat kum ki ain ki kanun bad kala aibor ia ki Ophisar ba kin pynduh jait ia ki.
Ban tehlakam ia kane, ka ECI kala wanrah ruh ia ka Standard Operating Procedure lane SOP ban kloi leh eiei pyrshah ia ki khubor lamler, pyntip u CEC.
U CEC ula pynbna ba kane ka elekshon Lok Sabha kan long ha ki 7 tylli ki phase. Da ka jingpynbna ia ka tarik, ka Model Code of Conduct kala treikam mynta hapoh ka Ri.
Phase 1: 19th April (102 seats)
Phase 2: 26th April (89 seats)
Phase 3: 7th May (94 seats)
Phase 4: 13th May (96 seats)
Phase 5: 20th May (49 seats)
Phase 6: 25th May (57 seats)
Phase 7: 1st June (57 seats)