Shillong, 25 tarik Nailar 2025: Mynta ka sngi u myntri rangbah ka jylla u Conrad K Sangma u la plie ia ka Mawhati C&RD Block ha ka prokram kaba la long ha Umsohliat. Ha kane ka jingpynbna paidbah la donlang ruh u Myntri ka tnad C&RD, u Abu Taher Mondol MLA ka Mawhati, u bah Charles Marngar bad u MLA ka Umsning u Dr Celestine Lyngdoh.
Haba ai ka jingkren plie, u Myntri Rangbah ka Jylla, u Conrad K Sangma, haba ai khublei ïa ki paidbah ka Mawhati u la ong ba ka jingplie ïa kane ka Block ka dei ka jingpynpaw ïa ka jingshimkhia jong ka sorkar ban rah ïa ka synshar khadar kham jan sha ki paidbah.
“Ki la don haduh shi lak ngut ki briew bad ka jingbun briew hapoh ka Umsning C&RD bad ki briew ki la hap ban iaid palat 100 kilomitar ban poi sha kawei ka ophis jong ka block bad dei na kata ka daw ba ka sorkar ka la sngew ba kane ka dei ban kylla bad kumta kane ka jingkular ban pynthikna ba ngi long lah ban ai ïa ki jingshakri ki jingdonkam kiba kham jan bad ki paidbah ka la ïalam haduh kane ka sngi,” u la bynrap ba ka Mawhati block kan ym ïarap tang ïa ka… ki briew jong ka Mawhati hynrei kan ai jingmyntoi ruh ia ka shnong Umsning namar ba katto katne ki shnong jong ka Umsning ki hap hapoh ka block Mawhati.
U la pyntip ruh ha ka jingialang shaphang ki kam pynroi na ka bynta katei ka thain kaba kongsan napdeng jong ki ka long ka surok Umsning-Mawhati ka ban long ka lynti iaid kaba kongsan ha ka ioh ka kot bad ka synshar khadar. Shuh shuh u la kyntu ïa ki paidbah ba kin ïatreilang bad ïatreilang bad ka sorkar ha ki prokram pynroi bad kyntu ruh ïa ki heh ki ban sa trei ha Mawhati C&RD Block ba kin ai ka jingshakri ïa ki paidbah da ka jingsbun bad jingsngewrit. Shwa kane, u Myntri ka tnad C&RD, u Abu Taher Mondol u la ong ba ki jingtei kin pynkylla ïa ki kam khaii pateng ha ka thaiñ bad bynrap ba ka C&RD Block kan ym tang ban wanrah ïa ka jingsynshar kham jan sha ki paidbah hynrei kan wanrah ruh ïa ki lad kamai sha ki paidbah.
U MLA ka Mawhati, u bah Charles Marngar ha ka jingkren jong u u la ong ba ka Mawhati C&RD Block ka dei ka sharak jong ka jingkyrmen, ka dak jong ka jingkiew shaphrang bad ka sakhi jong ka lawei kaba phyrnai kaba wanrah ïa ki jingshakri sha ki samla, ki nongrep, ki longkmie bad ki paidbah ka Mawhati. “Kane ka block thymmai kan kyntiew ïa ki jaitbynriew, kan kyntiew ïa ka roi ka par bad kan kyntiew ïa ki jingim lyngba ka jingsdang ïa ki prokram pynroi bapher bapher jong ka sorkar kiba ïadei bad ka koit ka khiah, ka pule puthi bad ki jingtei ha Mawhati,”
u la bynrap. Haba pynpaw ïa ka jingsngewnguh ïa ka sorkar kaba la wanrah ïa ka Mawhati C&RD Block u la bynrap ba ka jingwan ïa kane ka Block ka dei ka jingmih na ka jingtreilang jong baroh. Kane ka Block kan ai jingmyntoi ruh ïa ka Umsning konstitwensi namar 66 tylli ki shnong ka Umsing ki hap hapoh ka Mawhati C&RD Block. U Myntri Rangbah ka Jylla lem bad kiwei ki riew rangbah ki la sam ruh ïa ki M-Tab sha ki khynnah klas 11 ha kane ka sngi.