Shillong, 19 Naitung 2025:
Ka sap bad ka phong ki samla jong ka jylla Meghalaya ha ka kam ïalehkai KUDO ka la nang paw shai bad kiew sted. Ka Kudo Association of Meghalaya kaba la ialam da u Bah Pynshai Mawrie ka la pynbna paidbah ba ka la lah ban phah haduh 16 ngut ki nongïalehkai na ka jylla sha ka lympung national kaba yn pynlong ha ka Akshay Kumar KUDO Tournament ha ka jylla Gujarat ha u bnai October 2025.
Ha ka jingïakynduh sha ki lad pathai khubor ha Shillong Press Club, u Bah Mawrie u la pynpaw ba kitei ki nongïalehkai ki la mih na ka coaching camp kaba la long ha Sivasagar, Assam, kaba la pynlong ha une u bnai ba lah leit noh.
Ka KUDO, kaba dei ka jingïalehkai ba wan na Japan, ka long ka full-contact combat sport, kaba ïajan bha bad ka mixed martial arts (MMA). La pyni ba kane ka sport ka don bun ki myntoi ha ka koit ka khiah bad ka jingshai ka jingmut, bad mynta ka la paw bha ha India lyngba ka jingwanrah da u nongïalehkai bollywood Akshay Kumar bad u Mehul Vora.
U Bah Mawrie u la pynpaw ruh ba ka KUDO ka dei ka jingïalehkai ba la ithuh da ki tnad ba khraw kum ka International Olympic Committee (IOC), Khelo India, Sports Authority of India (SAI) bad ka Ministry of Youth Affairs & Sports jong ka Sorkar Pdeng. Kane ka pyni shai ba ki samla jong ka jylla ki don ka lad ban ioh rung sha ka lympung ïalehkai national bad shabar ruh lada ki ioh ka jingkyrshan kaba biang.
Ka Kudo Association of Meghalaya ka la ai ruh ka khublei kyrpang ia u MLA Shri Shanor Shullai uba la iarap pisa haduh ₹50,000 ban pynlong ïa katei ka camp kaba long kum ka shnat sdang ban pynmih ia ki samla ba tbit na kane ka jylla.
“Ngi kyrpad ia ki bor synshar bad ki tnat trei kam ba kin ai lad ia ngi ban ioh rung ha ka National Games 2027, namar ba kane ka jingïalehkai KUDO ka la don ka kyrdan ha ka pyrthei bad ka la ai burom ia kiba trei shitom,” ong u Bah Mawrie.
Na ka liang ka Association, ki pynpaw ruh ba ka thong ka long ban kyntiew kyrdan ïa kane ka jingïalehkai ha Meghalaya bad ban buh ha ka kyrdan kaba kham heh ha ka thup sport jong ka ri.