Na ka bynta jingmyntoi ki nongaplai kam DSC Khliehriat pyniar jingtip U RTI:Reachingson Siangshai

Shillong, 30 Lber, 2026: U Nongwad RTI bad riewsaid aiñ, u Bah Reachingson Siangshai, ula pynpaw ïa ki jingeh bad jingbym shai ha ka rukom thung kam jong ka District Selection Committee (DSC) ha East Jaiñtia Hills district, Khliehriat da kaba kynnoh ba don ka jingduna ha ka jingïaid beit bad ka jingshai ha kiba bun ki bynta jong ka jingthung kam.
Haba kren sha ki lad pathai khubor ha Shillong Press Club, u Bah Siangshai ula pyntip ba ula dep ban aiti ïa ka jingthoh sha u Myntri Rangbah ka jylla lyngba u Deputy Commissioner ka East Jaiñtia Hills, u Manish Sharma, IAS, da kaba kyrpad ban tuklar mardor bad ban wanrah ïa ki jingpynkylla ha ka rukom thung kam.
Ula ong ba ha ka jingïalang kaba la pynlong da u Deputy Commissioner ha ka 27 tarik Naiwieng, 2025, la wanrah shibun ki mat kiba dei bynta ban ïada ïa ka hok jong ki nongapply. Ïa kine la buddien biang ha ki bnai Kyllalyngkot bad Rymphang, 2026 lyngba ki jingthoh paidbah.
Napdeng ki mat ba kongsan, u la kdew ïa ka jingbym pyntip lypa ïa ki qualifying criteria kum ki mark jong ka written test, physical test, typing test bad language test. U la ban jur ba dei ban pynbna paidbah ïa kine shuwa ban sdang ka eksamin khnang ban pynïaryngkat ïa baroh ki applicant.
U la pynpaw ruh ïa ka jingkulmar ha ka jingpynbna vacancy, da kaba kdew ba don ka jingïapher hapdeng ki kam ba la advertise bad ka result kaba la mih. Ha kawei ka bynta, u la kynnoh ba wat hapdeng kiba bun ki vacancy, hynrei tang uwei u candidate la jied namar ka jingïaryngkat mark bad la jied da kaba peit tang ïa ki mark jong ka written test.
U Bah Siangshai ula ai jingmut ruh ba dei ban pynbha ïa ka rukom pyntip paidbah, da kaba phah jingïathuh lyngba SMS, email bad WhatsApp khnang ban pynsuk ïa ki applicant, ym tang da kaba shaniah ha ka website. La ong ba ka ophis ka la kular ban wad lad ïa kane.
Shuh shuh, ula kyrpad ban don ka recruitment calendar kaba shai khnang ba ki applicant kin tip lypa ïa ki tarik jong man ki bynta jong ka jingthung kam. Katba ki bor shnong ki la ong ba kane ka donkam ïa ka jingmynjur na ka sorkar jylla, hynrei kin pyrshang ban pynbiang jingïathuh lypa.
Ha kaba ïadei bad ka rukom pynlong eksamin, u la ai jingmut ban don bun set ki question paper, ban pynkylla ïa ki MCQ pattern, bad ban pynmih paidbah ïa ki answer key. U la ong ruh ba dei ban shah ïa ki applicant ban rah noh ïa ki question paper hadien ka eksamin.
U la pynpaw ruh ïa ka jingsngewkhia halor ka jingbym don CCTV surveillance bad ka jingbym lah ban khang internet ha ka por eksamin. Watla ki bor ba dei peit ki la kdew ïa ki jingeh, hynrei ki la ong ba yn pynkhlaiñ ïa ki SOP ban ïada na ki jingïaleh thok.
U la ban jur ruh ïa ka jingdonkam ban pynbeit ïa ka rukom pyndonkam mobile ha exam centre, da kaba buh ïa ki counter ban shimti bad pynphai ïa ki mobile.
U Bah Siangshai ula pdiang ïa ka jingkular ba yn pynmih paidbah ïa ki mark jong baroh ki bynta kum ka written test, interview bad kiwei ki test, hynrei ula ong ba dei ban don ka rukom evaluate kaba shai bad jingïaryngkat, khamtam ha ka interview.
U la kyrpad ruh ban don ka grievance redressal system kaba biang khnang ba ki applicant kin lah ban ujor lada don kano kano ka jingeh ha ka por jong ka jingthung kam.
Halor ka tie-breaking rule, ula ong ba ka jingpyndonkam tang ïa ki mark jong ka written test kam long kaba biang bad donkam ban peit biang ïa kane.
U la pyntip ba ula dep ban aiti bun tylli ki memorandum, kynthup ïa kawei ha ka 24 tarik Nohprah, 2025 bad kawei kaba dang shen, da kaba kyrpad ïa u Myntri Rangbah ban tuklar bad pynbeit ïa kine ki bynta.
U Bah Siangshai ula pynkut da kaba ong ba kine ki jingpynkylla ki long kiba donkam eh ban pynthikna ïa ka jingshai, ka jingïaid beit bad ka hok ha ka jingthung kam sorkar ha ka district