Ka Jaiñtia Students Union (JSU) ka la pynlong ia ka jingiakhih shong kyllaiñ myngngor ha Lad Kiang Nangbah Government College, Jowai namar jingbym ïoh class bun ngut ki samla na Ri Lum Jaiñtia hadien ba ki la pass ïa ka eksamin Secondary School Leaving Certificate (SSLC) ba la pynbna ha ka resol jong ka Meghalaya Board of School Education ba mynta u snem 2025.
Halor ka jingbym ïoh class bun ngut ki samla na Ri Lum Jaiñtia ka JSU ka pynpaw ia ka jingpyrshah kumta 28 tarik Jymmang u AK Singh, Deputy Commissioner ka West Jaiñtia Hills District ula khot ia ka union sha ka miet jingiakren bad ban pyntip ruh ba ka sorkar ka la pynioh bun tylli ki jaka pule naduh ka lain jingpule Arts, Science bad Commerce ha katei ka thaiñ.
u Samla Jersom Shylla, President ka union u la ong, ba ka jingioh bun tylli ki jaka pule kam pynhun satia ia ka union namar kim pat ioh jingpynshai pat halor ka jingthmu ka sorkar ia ka bai class bad ka jingpynbiang ia ki nonghikai.
Kumta u la buh jingkylli ia ka sorkar ba ka don jingthmu aiu pat halor ka bai class bad ki nonghikai?
Kum ban shu kdew, kane ka jingïakhih ka JSU kan dei ruh na ka jingbym seisoh ka jingai jingmut sha ka sorkar ban pynïoh sa ka skul miet (Evening shift) ha Kiang Nangbah Government Higher Secondary School bad ka skul step (Morning shift) ha Government Boys’ Higher Secondary School.