Shillong, Jylliew 18:Ka jingtohkit ba jur jong ki pulit ka Meghalaya halor ka jingshah pyniap u Raja Raghuvanshi, u rangbah na Indore, ha ka por honeymoon jong u ha Sohra, ka la pynpaw ia ka jingsngewshyrkhei halor ka jingiashim bynta ka tnga jong u, ka Sonam Raghuvanshi, ha kane ka kam sniew kaba pynlong ia ka paidbah ban shah pynsyier bad sngewsih.
Ka Sonam, 24 snem ka rta, kaba dei ka khun jong ka longïing kaba don business furniture sheet ha Indore, ka bat ruh ia ka kam hapoh kata ka karkhana. Ka la don ka jingïadei shimet bad u Raj Kushwaha, uba dei u accountant bad u briew ba jan bha jong ka. Ka longïing jong ka Sonam ka la pynbeit ka jingiathoh bad u Raja Raghuvanshi, 29 snem, bad ki la ïathoh ha ka 11 tarik u Jymmang, 2024.
Hadien ka jingiathoh, u Raja bad ka Sonam ki la leit sha Meghalaya kum ka bynta ka honeymoon. Hynrei, kaba la jia ha kata ka por ka la pynpaw ba ka jingiathoh kam long kaba shisha, hynrei ka la kylla long ka lad ban pyndep ia ka jingthmu pyniap kaba la pynkhreh da ka Sonam bad u Raj ryngkat ki lai ngut ki runar – u Vishal Singh Chauhan, Akash Rajput bad Anand Kurmi.
Ka jingtohkit jong ki pulit ka pyni ba ka jingthmu pyniap la pynkhreh naduh u bnai Rymphang, bad la siew T.50,000 sha ki runar. Hynrei ka jingjia kam dei ka “contract killing” kumba ju jia ha ki bynta jong ka ri, hynrei ka dei ka kam sniew kaba la pynlong da ki paralok ban iarap ia u Raj.
Ha ka 23 tarik Jymmang, u Raja bad ka Sonam ki la jah rngai hadien ba ki la mih na ka homestay ha Nongriat. La ong ba ha kata ka sngi, ki runar ki la pynlong ia ka jingshah pyniap ha ka jaka kaba jan ka parking lot ha Riat Arliang, Sohra. U Vishal u la shoh nyngkong da ka dao, bad ka Sonam ka la phet noh tang shu sdang ka jingshah bom u Raja. Kiwei pat ki la bteng ban shoh ia u Raja haduh ba u iap. Hadien kata, ka Sonam ka la wanphai ban iarap bret ia ka met iap hapoh ka gorge.
Ka met iap jong u Raja la lap ha ka 2 tarik Jylliew, katba ka Sonam ka la mih paidbah ha Uttar Pradesh bad la surrender noh ha ka 8 tarik Jylliew ha Nandganj Police Station. La kem lut ia baroh san ngut kiba donkti bad ka Special Investigation Team (SIT) ka la leh ka reconstruction ban pynshisha ia ka jingjia.
U Govind, u para jong ka Sonam, u la ong ba ka longïing jong ka ka la pynkut syndon ia ka jingïadei bad ka, bad u la ai ka jingiarap sha ka longïing u Raja ban ïoh ka jingsngiang hok.
Kane ka jingjia ka la pynshyrkhei ia ka jylla bad ka ri baroh kawei, kaba la shon ha ka jingmut jong baroh kum ka nuksa ba ka jingieit ha ka dur ba shemphang ruh ka lah ban kylla long ka jingkynnoh ban pyniap.