Shillong 15 Iaiong Ka myntri khynnah ka sorkar pdeng ka sorkar India ka Savitri Thakur ka la wan jngoh ia ka jylla Meghalaya kaba lai sngi naduh ka 15 haduh ka 17 tarik u Iaiong 2025.
Ha kane ka jingwan jong ka, ka Myntri ka la iakynduh ia ki heh Sorkar jylla bad pynlong jingialang bishar bniah bad ka tnad Social Welfare jong ka Sorkar Meghalaya, ia kaba la pynlong ha Hotel Marriott By Court Yard.
Ka Myntri ha jingialang ia kaba la don bad synran da ka DC ka kong RM Kurbah bad ka Director ka tnad Social Welfare jong ka Sorkar ka Camelia Dorreen Lyngwa MCS .
Na ka liang ka Myntri haba ioh ban iakren sha ki lad pathai khubor ka iathuh ba ka jingwan jong ka sha Shillong ka long ban ioh jingtip bad shem ia ki jingeh jong ka jylla meghalaya bad pynleit jingmut ha ki skhim bad ki prokram ba la kyrshan da ka Sorkar Pdeng hapoh ka Tnad Pynroi Kynthei bad Khynnah.
Ha ka jingwan jngoh jong ka sha Shillong ka iakynduh ia u Lat ka jylla na ka bynta ka jingiakynduh burom bad pynlong ia ka jingbishar bniah ha ka kyrdan district ha East Khasi Hills katkum ki jingbthah jong ka tnad pynroi ka thain shatei lammihngi (DoNER).
Ha ka 16 tarik Risaw, ka Myntri la leit jngoh ïa ki jaka sumar ba kongsan bad ki jaka ai jingbha ha nongbah Shillong, kynthup ïa ka One Stop Centre ha Ganesh Das Hospital, Shakti Sadan ha Mawroh, bad kawei ka Child Care Institution ha Mawkasiang. Kumjuh ka la leit jngoh ïa ka Community Health Centre, Anganwadi Centre ha Mawsmai, bad ban jurip ïa ki kam pynroi hapoh ka MGNREGA bad PMAY(G) bad ruh ban leit jngoh ïa ka Aqua Park cum Visitor Information Centre ha Khliehshnong bad jurip ïa ki surok PMGSY ha ka thaiñ.