Ka ilekshon sha ka ka Iingdorbar thawain jong ka jylla kan long la shem snem kata ha u 2023 bad kumba ka long mynta kiba bun ki kyrtong ki la pynkhreh shait shait ban iakhun ha kane ka ilekshon ban wan.
Nadpeng kiba la pynkhreh ki kynthup ia kiba thmu ban dang iakhun ha ka sien kaba nyngkong nalor ki MLA bad MDC bad kumjuh ruh kiba la iakhun teng.
Haba phai sha Mawkyrwat constituency na ki khubor ba la ioh lum la iathuh ba nalor u MLA Bah Renikton Lyngdoh Tongkhar bad u MDC Bah Carnes Sohshang kin don ruh kiwei pat ki ban mih thymmai ki ban iakhun na katei ka constituency.
Napdeng kiba la iohsngew khubor bha ki kynthup ia u bah H Stalyne Diengdoh MCS ba la shongthait ha kaba dangshen u la pyniasoh bad ka Party NPP bad la sngewthuh ruh ba un iakhun na kane ka party kaba la ialam da U Conrad Sangma kum u President.
Nalor kane la ioh khubor ruh ba U Bah MedalSing Lyngdoh uba la thmu ban iakhun na ka UDP dangshen u la mih noh na ka party hadien ba la ioh jingtip ba u MLA jong ka HSPDP U Bah Renikton Lyngdoh Tongkhar un iakhun noh na ka UDP bad iehnoh ia ka HSPDP.
Wat la ym pat lah ban pynthikna la u bah Medalsing un iakhun na ka party aiu, hynrei la iathuh ba un iakhun beit ia kane ka ilekshon ban wan bad ki tyllong khubor ki iathuh ba une u rangbah u lah ban iakhun noh na ka party HSPDP kaba dei ka party kaba la pynjop ia u bah Renikton Lyngdoh ha u snem 2018.
Shuh shuh dangshen la iohi lyngba ki lad pathai khubor ba U Bah SS Cajee ruh un iakhun na Mawkyrwat Constituency, hynrei une U Rangbah um pat pynthikna la un iakhun na ka party aiu.
Haduh mynta na Mawkyrwat constituency ki dei tang kitei ki Rangbah kiba la paw kyrteng bha bad kiba la iakren sharum shaneng ba kin iakhun beit ha kane ka ilkesho ban wan bad ki lah ruh ban don kiwei pat ki kyrtong ki ban dang mih kata shuwa ban poi ka sngi thep vote.
Kumba ka long mynta ki party kiba la pynkhreh ban pyniakhun kyrtong na katei ka constituency ki kynthup ruh ia ka party PDF TMC, BJP bad kumjuh ka RPI, hynrei ym pat lah ban tip la kine ki party kin ioh kyrtong ne em ban pyniakhun.