Shillong, 4 Jylliew 2025 – Ha ka jingïaid lynti kaba sah kynmaw bad ban kyntiew ïa ka kam jngohkai bad ka sports, u Myntri Rangbah ka Meghalaya, u Conrad K Sangma, ula plie paidbah mynta ka sngi ïa ka Meghalinor, ka yacht shwa eh jong ka jylla ha Umiam Lake. Ha kane ka jingïalang la don ryngkatlang ruh u Myntri ka Tnat Jngohkai, u Paul Lyngdoh, u Commissioner & Secretary ka Tnat Jngohkai u Vijay Kumar D, bad u Director ka Tnat Jngohkai, u C V Diengdoh.
Ha ka jingkren jong u, u Myntri Rangbah u la ong ba kane ka jingplie paidbah ka Meghalinor ka don ka jingmut kaba kyrpang namar ba ka pynïasnoh lang ar tylli ki liang kiba kongsan jong ka sorkar – kata ka Tourism bad ka Sports. U la ong ruh, “Ha kino kino ki bynta – ka Tourism ne ka Sports – ngi don ki thong, ki jingthmu bad ka jingïohi jngai ban ai ka lad kamai jakpoh bad kamai kajih, da kaba buh ïa ki samla ha ka shongpdeng jong ka jingïaid lynti jong ngi. Kane ka sngi ka pyni shai ïa kane ka jingïasnoh lang.”
U la bynrap ruh ba haduh 50% ki paidbah ka Meghalaya ki dei ki briew kiba hapoh 20 snem ka rta bad ka sorkar ka hap ban pynkhreh bha na ka bynta kane ka kynhun. “Ngi hap ban buh ïa ki nongrim ba skhem ban ai lad ïa ki ban ioh u paidbah ba bun kam bad bun lad ha ki snem ban wan,” u la ong.
U Myntri Rangbah u la kdew ruh ba ka Umiam Lake kam pat poi shano shano ka lah ban poi bad ka sorkar ka la sdang ban pyntreikam shibun ki rukom kyntiew, kum ka water sports bad ka sailing ha katei ka jaka, kynthup ruh ka jingpynbha ïa ki jingtei bad jingdon burom. U la ong ruh ba ka sorkar ka thmu ban kyntiew ïa kane ka jaka sha kawei na ki resort ba bha tam ha thaiñ shatei lammihngi jong ka ri. “Kane ka jingthmu kaba rit hynrei kaba don jingmut kan kyntiew ïa ka jingsngewbha jong ki nongwan jngohkai – hynrei kane ka dei tang ka sdang,” u la ong.
Haba kdew ïa ka jingkongsan jong ka Umiam Lake kum ka jaka ai lad ïa ki kam sports ha um, u Myntri Rangbah u la ong ba kane ka jaka kaba don ka dur kyntang bad ka jingïarap jong ka mariang, ka lah ban kiew shaphrang shuh shuh kum ka jaka lehkai sport ha um. U la ai ka jingïaroh ïa ki nongïalehkai kiba la wanrah nam bad burom sha ka jylla ha ki National Games kaba la dep ha ka kayaking bad canoeing. U la bynrap ruh ba ka Umiam Lake ka lah ban kylla long ka centre jong ki kam water sports ha jylla.