Shillong, 3 Naitung 2025:
Ka Iingkashari High Court jong ka jylla Meghalaya ka la shim ïa ka rai kaba don ka jingïaroh ban pynbeit bad pyniaid hok ïa ka jingeh kaba la long sahkut slem ha Shillong — kata ka jyrsieh ki nongdie madan ha thain Police Bazar bad kiwei pat ki bynta jong ka sor.

Ha ka hukum kaba la pynmih mynta ka sngi, ka Iingkashari hapoh ka jingïalam jong u Chief Justice I.P. Mukerji bad u Justice W. Diengdoh, ka la thung ïa u Senior Advocate Subhasis Chakrawarty kum u Special Officer ban peit bad tehlakam ïa kane ka kam.

Ka jingthung ia u Special Officer ka wan lyngba lai tylli ki PIL — PIL No. 17 of 2021, MC (PIL) No. 1 of 2025 bad PIL No. 9 of 2024. La bthah ïa ka Sorkar Jylla ban siew ₹75,000 tyngka kum ka bai trei jong u Special Officer shuwa ka 11 tarik u Naitung 2025.

Ki Nongrim ba Hukum da ka Iingkashari: Pynlong Ka Jingthew ïa ki Nongdie Ba Don Licence:
La bthah ba dei ban pyndep mardor ka jingthew ïa ki nongdie madan kiba don licence — ba la kdew ba ki long katto katne 349 ngut. Ka jingthew kan long lyngba ka jingïatreilang hapdeng u Special Officer, u General Secretary ka Hawkers’ Association, ki bor shnong bad ki pulit.
Khang Lut ïa Ki Nongdie Ba Nul Licence:
Ki bym don ha kane ka list yn khein kum ki nongdie bar-licence bad yn khanglad ia ki ban die ha Police Bazar. La ai bor ïa u Special Officer ban pynkhamti lem bad ki bor pulit bad ka Association ban pynbeit ïa kane khlem pynmih jingkulmar.
Ka Iing Bishar ka bthah ia ka Por Die Ba Lah Ai Tang Ki nongdie ba don licence kin shah tang ha kine ki por die:
12:30 PM – 2:00 PM 7:30 PM – 9:00 PM
Ka Association ka la ai ka jingkular ba ki nongdie kin bud beit ïa kine ki por khnang ba yn nym pynwit ïa ka leit ka wan bad ka jingiapait pait paidbah. Lada don ka jingpynkheiñ, ka Court ka la bthah ba yn khang lut ïa ka jingdie ha kane ka thain.
U General Secretary jong ka Association u la kular ba lada ka Sorkar ka ai jaka thymmai, kin mih noh mardor. Lada kim leh kumta, yn pynkynriah noh kloi.
Ka Lad sha ki Nongdie Bar Licence:
Kito kiba dang khlem licence ki lah ban thoh ban pan licence bad ka Sorkar ka hap ban bishar katkum ka aiñ. La ong ruh ba ka Iingkashari kan peit bniah halor ka jingtreikam halor kine ki jingpan lyngba ka kaiphot na ki bor ba dei peit.

U Special Officer u hap ban pyntreikam ïa kine ki hukum da ka jingstad, ka jingshemphang bad khlem pynmih shaphang ka jingshong syier paidbah. Ka kaiphot bniah yn sa phah sha ka Iingkashari ha ka 5 tarik u Nailar 2025.

Please Share this news

Leave a Reply

Your email address will not be published. Required fields are marked *