Ka kong Angela Rangad Nongialam jong ka Thma U Rangli-Juki (TUR) kan sa iakhun ia ka ilekshon sha ka Iingdorbar Thawain ka jylla na South Shillong Constituency kaba dei ka Constituency ba la mihkhmat da u Bah Sanbor Shullai uba dei na ka party BJP.
Haba pynbna paidbah halor kane ka jingthmu ban iakhun ia ka ilekshon ha u snem 2023 ka kong Angela ka la iathuh ba na ka liang jongka kan iakhun ia kane ka ilekshon ban wan kum ka kyrtong shimet.
Ha ka juh ka por ka kong Rangad ka la iathuh ba ryngkat bad ka yn iakhun lang ruh u Pastor Kyrsoibor Pyrtuh u ban iakhun na North Shillong Constituency.
Kine ki 2 ngut ki nongialam seng treimon sngewbha kin pyndonkam ruh ia ka KAM Meghalaya kum ka rynsan ban ialap ilekshon ha kaba ka kong Wanpynhun Kharsyntiew kan long kum ka nongialam jong katei ka rynsan kata ka KAM Meghalaya.
Haba kren ha ki nongthoh khubor mynta ka sngi ka kong Angela Rangad ka la iathuh ba ka daw kaba la pynlong ia ka ban rung sha ka jylli jong ka sain hima ka dei namar ba ka iohi ba ki nongialam sain pyrthei kiba mynta ki long ki bym iohi jngai bad ki bym don nongrim ban pruid dak ia ki ain ki kanun bad ki polisi.
Shuh shuh haba bynrap ba katei ka rynsan ialap ilekshon ka KAM Meghalaya ka dei ka rynsan kaba wan na ki thap ki dap kiba im kyndoi jakpoh ha ki iew ki hat bad kiba trei bylla Iingbriew kiba la iakhun ia ki jingdawa na ka bynta ki hok jongki.
Ka kong Rangad ka la ong ba ym shym la kwah ban register ia ka KAM Meghalaya kum ka kynhu seng sain pyrthei lane ka political party namar kiba bun ki kyndon kiba hap ban bud katkum ki kyndon jong ka Election commission jong ka Ri India, kumta ki la rai ban iakhun beit kum ki kyrtong shimet.