Ka thma hapdeng ki lehnoh Hamas bad ka Ri Isreal ka la nang jur katba nang mih ki sngi bad na ka liang jong ka Isreal ka la shim ia ka rai ban rat dyngkhong ia ki lehnoh Hamas ha Gaza.
Nalor ka jinghiarthma na suin ka Isreal ka la thmu ban hiar thma ruh sa na ryngkew bad duriaw ha kaba ka la phah ia ki tank ialehthma jong ka sha khappud ban tur sha Gaza bad la iohi ruh ia ka jingpynbeit bom jong ka Isreal ia ki jhad jong ki lehnoh Hamas
Lah ban kdew hangne ba na ka liang jong ki shipai Isreal naduh ka sngi thohdieng ki la bthah ia ki riew paidbah kiba shong ba sah ha ka Nongbah Gaza ba kin mih noh shi syndon namar ki don ka jingthmu ban hiarthma naphang ia ki lehnoh Hamas kiba riehtngen ha kane ka jaka.
Kiwei pat ki khubor ki iathuh ba na ka liang jong ki lehnoh Hamas ki la khang pyrshah ia ki riew paidbah ba kin mih na la ki jong ki iing ki sem ban phet sha ki bynta ba shathie jong ka gaza namar ba ki kwah ban pynlong ia ki riew paidbah kum ka stih iada na ka jinghiarthma jong ki shipai Isreal.
Kumba ka long mynta ka jinglong jingman jong kane ka thma kam shym iohi ba kan don ka jingduna, hynrei ka nang jur nangjur bad ka Ri isreal ka la pan jingiarap ruh na kylleng ki ri ka pyrthei ban iakhun pyrshah ia ki Hamas.
U Prime Minister jong ka Ri Isreal u la niew ia ki lehnoh hamas kum ki ISIS bad u la ong ba ym don jaka ia ki lehnoh bad ka jingthmu hi ka long ban pynkut syndon ia ka jingsynshar jong ki lehnoh hamas ha ki bynta jong ka Gaza kaba hap hapoh ka Ri Palestine.