Shillong, 18 Nailar 2025: U Myntri Rangbah ka jylla, Conrad K Sangma, mynta ka sngi u la plie paidbah ia ka STEM Fusion – A One Day Workshop bad Student Exhibition kaba la pynlong da ka North East Centre for Technology Application and Research (NECTAR) ryngkat ka Smart Village Movement bad ka IISER Pune ha State Convention Centre, Shillong.
U Conrad u la kynmaw ia ki sngi pule jong u bad u la ong ba ka jingpule Science bad Mathematics ka ju ktah ia ki khynnah namar ka long kawei ka subject kaba ki sngew sheptieng. U la ong ruh, “Ka long kaei kaei kaba sngew syar bad bym da sngewtynnad ban pule Science bad Maths, bad nga ngeit ba bun ki khynnah ruh mynta ki dang don ka jingmut kumjuh.”
U Myntri Rangbah u la ong ruh ba ka sorkar bad ki seng kum ka NECTAR bad Smart Village Movement ki trei borbah ban pynlong ia ka STEM—Science, Technology, Engineering & Mathematics—kaba kynthup ruh ia Science bad Maths, ba kan long kaba sngewtynnad, ba khring bad ba pynshlur ia ki khynnah. “Kane ka dei ka lynti ban pynmih ia ka jingkwah tip bad ka jingkmen ha ki khynnah haba ki pyrkhat shaphang STEM,” u la ong. U la ai jingmut ruh ba dei ban don shuh shuh ki lab bad wat ki Lab on Wheels lane mobile labs ban ioh rung sha ki bynta bapher bapher jong ka jylla.
Ha kaba kut jong ka jingkren, u Conrad u la ong ba ki kam kum kine kim lah ban trei tang marwei, hynrei ki donkam ia ka jingiatreilang jong baroh ki bynta kum ka Tnat Pule, ka NECTAR, ki nongshna kam bad kiwei de ki riewkhlaw. U la kyntu ba dei ban thaw shuh shuh ia ki STEM labs ha ki nongkyndong ban ai lad ia ki khynnah ban ioh riang jingtip.
U Myntri Rangbah u pynbna paidbah ban ai khusnam ia ka Science Exhibition, da ka pisa—T.2 lak na ka bynta nam lahduh, T. lakh, ba wanna ba ar T.50,000 ba lai T. 10,000 na ka bynta man ka skul lane group kiba shim bynta. U la pynbna ruh ba ki katto katne ki project ba thymmai jong ki khynnah kin shah jied bad ka sorkar kan ai jingiarap pisa ban pynkylla long kam.
Ha kane ka prokram la sakhi lang da u Principal Secretary, Sampath Kumar, u Director General ka NECTAR, Arun Kumar Sharma, u Vivek Shah na ka Smart Village Movement, Dr. S Muthu Kumaran uba dei u HOD ka Metallurgical and Mineral Engineering NIT, bad u Director ka Tnat Pule ka Sorkar Meghalaya.