Shillong, 18 Nailar 2025 – Ka Khasi Students’ Union (KSU) Laban Circle ha ryngkat ka jingiadonlang jong ka KSU Mawprem Circle ka la ioh ban pynphai noh ia 4 ngut ki khar Muslim, kiba kynthup ruh ia ar ngut ki khynnah, kiba la rung beaiñ sha ka jylla.
Katkum ka jingiathuh, ia kane ka longkmie Muslim la lap nyngkong ha Laststop, Laban, ha ka por ba ka dang khrong pisa bad ka khun jong ka na ki dukan ha katei ka jaka. Hadien ba la tohkit, la lap ba ka longkmie ka dang shu wan sha Shillong tang ar sngi mynshwa bad kam don satia kino kino ki kot ban pynshisha ia ka trai shnong lait noh tang ka Aadhar Card kaba ioh na Uttar Pradesh.
Na ka liang ka Seng ka la pyntip sha Laban Police Station, bad ha thanad ka longkmie ka la phla ba ka sah ha Cantonment Area, Jhalupara. Kumta, ki pulit ka Laban ki la phah noh ia ka sha Jhalupara Outpost ryngkat ka jingsynran jong ki dkhot ka KSU.
Haba la poi sha ka iing sah jong ka ha Cantonment, la lap ba don ruh u lok bad ka khun jong ka kiba sah beaiñ ha katei ka jaka da kaba shna iing tap shiliang khlem da ioh jingbit na kino kino ki bor. Mar mar kumta, ki dkhot ka Seng bad ki pulit ka Jhalupara Outpost ki la pynkit noh ia kine baroh ha ki kali ban phai noh sha shnong kaba ki wan.
Ka Seng ka pynpaw ia ka jingsngew bynniaw jur halor ka jinglong synjor jong ka Anti-Infiltration Cell jong ki pulit haduh ba ki bar jylla ki ioh rung bad sah beaiñ ha jylla khlem jingeh. Ka Seng ka kynnoh ruh ba wat lada ki phone sha ka Anti-Infiltration Cell ban pyntip ia kiba rung beaiñ, bunsien ym ju don briew ne bor pahara ban shimkhia.
Na ka liang ka KSU ka dawa jur ba ka Sorkar ka dei ban pynkhlaiñ ia ka Anti-Infiltration Cell bad ban shimkhia bha halor ka ishu influx. Ka pynpaw ruh ba lada ka Sorkar kam leh eiei, ka Seng hi kan shim ia ka aiñ ha la ka kti ban iada ia ka ri bad ka jaitbynriew na ka jingrung kyrthep ki bar jylla.