Shillong, 30 Lber: Ka seng NGO na Garo Hills kaba tip kum ka Nangrimgimin A. Chik Dol (NAD) lyngba u nongaiktien jong ka, u Bah Francis Ch. Marak, ka la pynrem jur ïa ki jingjia kiba dang shen ha West Garo Hills, kiba kynthup ïa ka jingkynnoh don ki kam thombor, jingïalam paidbah da ka jingïasyllok sniew bad ki kam be-aiñ.
Ka seng ka la ong ba ka don ka jingsngewkhia kaba jur halor ka jingwan rung be-aiñ jong ki briew kiba nabar, kiba la ktah ïa ka jylla Meghalaya, khamtam ha ki jaka shnong jong ki riewlum trai ri. Katkum ka jingïathuh jong ka seng, kine ki briew ki la pynkheiñ ïa ka hok halor ka khyndew bad ki jingdon jingem jong ki trai ri, bad ki la pyrshang ruh ban pynmih jingïapher jaitbynriew bad jingïakynad hapdeng ki paidbah.
Ka NAD ka la kynnoh ba kine ki kam kim dei kiba jia ryngkhat hynrei ki dei kiba la pynkhreh bha ban pynpra ïa ka jingïatylli bad jingïalong paidbah ha ka imlang sahlang jong ki riewlum. Ka seng ka la ong ruh ba ka jingsngap jar jong ki bor sorkar bad ka jingbym shimkhia ban tehlakam ïa ka jingwan rung be-aiñ ka la nang pynsniew ïa ka jinglong jingman.
Ha kajuh ka por, ka seng ka la pynrem ïa ka jingkem bad jingïashohbeiñ ïa ki nongïalam bad ki paidbah kiba la ïeng ha ka front ban ïada ïa ka hok, ka jingïadei jaitbynriew bad ka khyndew jong ki trai ri. Ka ong ba kine ki briew ki la shah lehbein watla ki ïakhih ha ka rukom paidbah bad paidbah.
Haba iakren sha ki lad pathai khubor ha Shillong Press Club u Francis Ch Marak u ong ka NAD ka dawa
Ban pynlong ka jingtohkit kaba laitluid bad khuid halor ka bynta jong ki briew ba wan rung be-aiñ bad ka bynta jong ki ha ka jingïapher jaitbynriew.
Ban pynlong ïa ka jingbeh shnong noh ïa ki nongshong shnong be-aiñ kiba la shong ha ki khyndew jong ki riewlum ha Garo Hills.
Ban ïada ïa ka hok riti dustur bad ka hok paidbah jong ki riewlum katkum ka Sixth Schedule jong ka riti synshar ka ri India.
Ban tohkit bniah ïa ki kam runar kynthup ïa ki kam jingïap bad jingïashohbeiñ kiba la jia ha ki bynta bapher bapher.
Ban shimkhia ïa ki mukotduma POCSO bad ki jingkynnoh jingïalam paidbah sniew ha ki bynta kum ka Tibilang.
Ban tehlakam ïa ki kam tih maw be-aiñ ha ki bynta jong North, West bad South West Garo Hills.
Ban ai jingïada ïa ki trai shnong kiba ïada ïa ka mariang bad ki jingdon jingem.
Ka jingïathuh shaphang ka jingïalang bad ka jingïakhih
U Bah Francis Ch. Marak u la ong ba watla don ki jingpynbor bad jingïateh kyndon na ka sorkar, hynrei ki paidbah ki dang ïai bteng ban ïeng skhem ban dawa ïa ka hok. U la ong ruh ba ka jingïakhih paidbah kaba la dep ka long kaba jop, bad ka jinglong jingman mynta ka dang jai jai ha ki bynta jong Garo Hills.
U la pynpaw ruh ba ka jingïakhih jong ki kam dei pyrshah ïa kano kano ka jaitbynriew ne niam hynrei ka long pyrshah ïa ka jingwan rung be-aiñ bad ki kam be-aiñ kiba ktah ïa ka imlang sahlang.
Ka NAD ka la kyntu ïa ka sorkar jylla bad ka sorkar pdeng ban shimkhia mardor ban pynneh ïa ka hok bad ka shongsuk shongsain, bad ban pynthikna ba ka hok bad ka burom jong ki riewlum kam dei ban shah pynkheiñ.