Rah la ki kti sha U Trai ban iaroh ka lympung ba 8 ka SKSR Katholik Zone 2 ha Pynthorumkhrah

Shillong – Ka Synjuk ki Seng Rangbah Katholik Zone II myn ha ka 12 bad 13 tarik u Bnai Risaw ka la pynlong ia ka lympung Dorbar kaba 8 ia kaba la pynlong ha Iing Mane U Petrus bad Paulus Bakhuid Shnat Niam Pynthorumkhrah.
Katei ka lympung kaba phra jong ka Zone II kaba kynthup ia ki Khyndai tylli ki Shnat Niam kiba kynthup ka Pynthorumkhrah, Mawpat Nongmensong, Mawpdang, Umpling, Nongthymmai, Laitumkhrah, Madanryting bad Nongrah.
Ka mat jong ka jingiakynduh Lang jong ki rangbah ka long ” Ko Kynrad to hikai iangi ban duwai kumba u Ioannis u la hikai ia ki synran” ia kaba la sot na ka Kospel u Lukas lynnong ba 1 dkhot ba 1.
Kum u Rangbah uba don ka jingleit khlieh ia ka Iing ka sem bad ka Balang la iathir ia ka juk nongialam nongialam mynta bad ki jingjyllei ki jingdih Drok ki Khun samla.
Na ka liang ka Synjuk ki Seng Rangbah Katholik Zone II bad ka Seng Rangbah Shnat Niam Pynthorumkhrah ki la pynlong ka jingialang kaba jop ha ka jingialam u Lyngdoh Nongsharai Rangbah u Sohblei Laurence Nongkseh bad u Sohblei Pascal Lyngdoh u Spiritual Director ka Zone ki la long ki nongai jingmut ia katei ka Dorbar jong ki.
Shuh shuh ia katei ka Dorbar ki rangbah la wan plie pyrda da u Vicar General ka Jylla Niam Bah Shillong u Sohblei Richard M. Majaw da kaba kyntiew ia ka lama jong ka Zone bad ka jingpyllait paidbah ia ka jingrwai theme song kaba ai kyrteng ” Rah sha U Trai la ki kti Ban iaroh da ki jingduwai ” ba la rwai da ki rangbah ka Pynthorumkhrah.
Ha ka Sngi u Blei ka 13 tarik u Archbishop Victor Lyngdoh DD u la long u kongsan ban pynmynta ia ka Mass bakhuid bad ki Lyngdoh Sohblei jong ki 9 tylli ki shnat niam.
La pynkut ia ka lympung Dorbar kaba 8 da ka jingpynhiar ia ka lama da u Archbishop Victor Lyngdoh ha ka jingiadon lang ki President ka Synjuk ki Seng Rangbah Katholik ka Shillong Archdiocese.