Shillong, 8 Nailar 2025 — U President ka Khun Hynniewtrep National Awakening Movement (KHNAM), u Bah Thomas Passah, u la pyntip ba ka party ka la sei da ka jingthoh Right to Information (RTI) ban wad bniah halor ka jyrsieh khyrdop kaba la jia hapoh ka Khasi Hills Autonomous District Council (KHADC).
Katkum ka jingong u Bah Passah, kane ka jingthoh RTI ka dei ban lap shai ia ka rukom pyntrei kam bad pyndonkam ia ka pisa paidbah hapoh ka Council, khamtam eh halor ki jingkynnoh ba don ka jingbym biang ha ka rukom synshar bad pyniaid kam. U la kdew ruh ba ka KHNAM ka pynpaw ka jingbynniaw halor ka jingbym don ka jingkitkhlieh pura na ka liang ki bor ba dei peit, kaba lah ban ktah ia ka jinglong trai bad ka jinglong laitluid jong ka KHADC.
U Bah Passah u la ong ba ka jingthmu jong ka RTI ka long ban pynlong ia ki paidbah ki tip shai ia ki kam kiba jia hapoh ka Council, bad ban pynbor ia ki bor synshar ba kin kitkhlieh khlem pynslem.U President ka Khun Hynniewtrep National Awakening Movement (KHNAM), u Bah Thomas Passah, u la pynpaw ba ka party ka la shimkhia bha halor ka jingdon ki khyrdop jong ka Khasi Hills Autonomous District Council (KHADC), hynrei haduh mynta ym pat shai mano ba shimti ban pyniaid ia ki.
U Bah Passah u la ong ruh ba ka jingbym tip shaphang mynno la khot tender bad kumno la pyniaid ia kane ka kam ka wanrah jingartatien kaba khraw. “Lada ka KHADC ka don ki khyrdop, ki paidbah ruh ki dei ban tip shai mano ba pyniaid bad shano ka pisa ka leit,” la ong u Bah Passah.
U la pyntip ruh ba namar kane ka jingbym shai, na ka liang ka KHNAM kan sa iaid da kawei ka lynti ban wad bniah, khnang ba yn lah ban lap ia ka jingshisha bad ban pynpaw paidbah ia ka jingpyndonkam ia ka pisa jong ka Council.
Ngim dei ban len, ka jingong u Bah Passah ka pynpaw ba ka KHNAM ka thmu ban shim ia ki sienjam kiba kham tyngeh lada ka KHADC ka dang sngap jar halor kane ka mat.