Shillong, 2 tarik Jylliew 2025: U Myntri Rangbah ka jylla, u Conrad K Sangma, mynta ka sngi u la leit ban ïa donlang ha ka jingïakynduh (Send-Off Programme) jong ka Team U-20 jong ki shynrang na Meghalaya kaba la shah jied ban leit sha ka Elite Training Camp ha ka Olympique Lyonnais Training Academy, ha Lyon, France naduh ka 5 tarik haduh ka 25 tarik Jylliew 2025.
Haba ai jingkren sha ki 28 ngut ki rangïalehkai, u Myntri Rangbah u la ong ba ka Meghalaya ka don ka lad kaba khraw lyngba ka bor jong ki samla, bad ba ka sorkar ka la pynlut pisa ban kyntiew ïa kane ka sap da ki jingtei bapher bapher ba pynshlur ïa ki samla.
“Katba nga la ioh pdiang ïa ka kot kaba ïa dei bad kane ka jingpynkhreh, nga la mynjur mar mar khlem da artatien, watla ka jinglut ka long T. 2.80 klur, namar kane ka pisa kam dei ka jinglut hynrei ka dei ka jingtynrai pisa (investment),” u la ong.
U la bteng shuh shuh da kaba ong, “Lada kano kano kawei na phi lah ban rung sha ka ISL ha ka lawei, phi lah ban sei pat ïa kane ka pisa ba ngi la tynrai ha phi tang hapoh shi samoi jong ka ISL bad kumta ka daw nga peit ïa kane ka jingphah ïa phi sha Lyon kum kawei ka lad ban tynrai pisa ha ki samla bad ka lawei jong ka jylla Meghalaya.”
U Myntri Rangbah u la ong ruh ba hapoh katto katne snem, ka jylla kan sa don kumba 50 tylli ki madan synthetic (artificial turf) bad ka madan ïalehkai phutbol kaba heh tam ha ka ri.
“Namar kata, lada ka dei ha ka bor briew, ka jingpynkhlain ïa ka sap jong ki rangïalehkai, ki jingïarap ha ka jingtei kum ki stadium bad ki football turf lane ki jingïarap sha ki club bad seng ïalehkai phutbol, kine ki long ki bynta jong ka thong ban kyntiew ïa ka lawei jong ki samla bad ka jylla,” u la bynrap.
Haba kren sha ki rangïalehkai kiba la shah jied ban leit rung ha kane ka training camp, u la kyrpad ïa ki ba kin shimkhia bad ban pynshlur ha lade.
“Man la ka por ba phi don hangta, kynmaw ïa kane ka lad ba phi la ioh, bad shim kabu wat ïa ka kabu rit tam ban pule, ban ioh jingtip, ban pynshlur ïa lade bad ban khein burom ïa ka lad ba phi la ioh ban leit,” u la ong.
La don lang ruh ha kane ka jingïalang u Richard Yangtham, IAS, Joint Secretary, Sports and Youth Affairs, ka Saloni Verma, IAS, Executive Director, MBMA, u Hamlet Dohling, President, Meghalaya Football Association, u D.D Shira, Director, Sports and Youth Affairs bad kiwei de.
Ka team kaba leit sha Lyon la pynkhreh da ka jingïatreilang jong ka Directorate of Sports bad ka Meghalaya Football Association. Kane ka team ka la dep rung ha ka Coaching Camp ha madan SSA la palat shisnem, ha ryngkat ka jingïashim bynta ha ka lympung U-20 Nationals ha Chhattisgarh, ha kaba ki la jam sha ka semi final – ka sien kaba nyngkong ha kane ka kyrdan jingïakhun.
Ka team kan lam khmat da u Rimankhraw Kharumnuid, u Defender kum u Captain. Kane ka training camp ba pynlong da ka Indo French Sports Association kan ai jingmyntoi da ka jingioh mad bad jingnang jingtip na ka pyrthei ïalehkai phutbol bad shabar ruh.