Ka Vatican ka nongbah jong ki khristan katholik ki la lehniam bad burom ia ka Dienghna jong ka jingsiew spah ia ka Pyrthei namar ka jingaiti u Jisu u Khun jong U Blei halor ka Diengphna ha U Lum Kalbari.
Ha Nongbah Shillong ka Jylla Niam Bah Shillong ka la pynlong ia ka jinglehniam bad jingmane ia ka Diengphna bad ha ki shnat niam baroh.
Ha shnat niam Pynthorumkhrah ki paid u Blei ki iashim bynta ki puson ia ka jingshah shitom bad ka jingiap jong U Trai Jisu Khrist halor ka Diengphna. La pynbynta ia kane ka jingleh riewblei bad mat puson ha ki 14 tylli ki jingjia lane ki jaka ba kongsan ka jingim U Jisu naduh kper Gethsemani shaduh lum Kalbari.
U Nongsharai Rangbah ka Shnat niam Pynthorumkhrah u Sohblei Laurence Nongkseh u la long u kongsan ban lehniam ia ka Diengphna Bakhuid.
Shwa ka lehniam ia ka Diengphna bad jingdoh ka Diengphna ki paid u Blei ki la shim bynta ha ki 14 jaka ki kynthup naduh ka jingpynrem ia U Jisu ban iap, la pynbah ha U Jisu ia ka Diengphna, ka jingkyllon U Jisu ha kaba shisien, U Jisu u iashem bad la ka kmie ba sngewsih, u Simon u iarap ia U Jisu ban bah ia ka Diengphna, ka Beronika ka ai rumar ha U Jisu, U Jisu u kyllon ha kaba arsien, U Jisu U kren ha ki kynthei Jerusalem, U Jisu u kyllon ha kaba laisien, la loit jubor ia ki jaiñ U Jisu, la sah narphna ia U Jisu, U Jisu U iap halor ka Diengphna, la pynhiar ia ka met U Jisu na ka Diengphna bad la tep ia U Jisu.
U Sohblei Laurence u kongsan jong ka jinglehñiam, u la dem pyllup ha khmat ka Diengphna u Khrist bad ai ka mat puson ha ka jingpule ia ka jingshah shitom jong u Jisu.Ha kaba u Jisu da ka jingieid U aiti ialade haduh ka jingiap na ka bynta ki pap, ki sang jong u khun bynriew.
La pynkut ia kane ka jingleh riewblei da ka Komunion bakhuid ha kaba da ki hajar ngut ki paid riewngeit ki la iashim bynta ha ka iabam ka iasip ia u Kpu uba la pynkyntang kaba long ka met bad ka snam jong U Jisu Khrist.