Shillong – Ka mat iatai ban pyntreikam ia ka Meghalaya State Investment Promotion and Facilitation Act, (MSIPF) 2024 kaba la dep rai da ka state kabinet ka sorkar MDA ha Dorbar Tlang ka KHADC ka long kaba lah ban shim rai.
Ia katei ka bynta iatai ka Khasi Hills Autonomous District Council (KHADC) ha ka sngi Palei kala mynjur da ka Resolution ba ka Sorkar ka dei ban pan jingmut shuwa na ki kynhun bapher bapher hashuwa ban pyntreikam ia ka Meghalaya State Investment Promotion and Facilitation Act, (MSIPF) 2024.
Ha ka Resolution, u Chief Executive Member (CEM) Bah Pyniaid Sing Syiem ula ong “Ka jingtyrwa ban pynkylla ia ka MSIPF Act, 2024, kaban ailad ia ka IMA ban thied jaka bad aijaka sha ki nongsengkam kan sa iatakhuh bad kiba bun ki kyndon jong ka Khasi Hills Autonomous District (Regulation and Administration of Land) Act, 2021 bad kan ktah ia ka jingsngew jong u paidbah babun balang”.
U Bah Pyniaid ula kdew ruh ba ka riti bat khyndew jong ki Khasi kaba don ha ki Dorbar Shnong, Dorbar Raid, Dorbar Hima ka dei dei ka rukom treikam kaba tam kaba la pynneh pynsah ia ka jinglong kyrpang jong ki paid Khasi.
Ka KHADC kumba la pynkupbor da ka Sixth Schedule jong ka Riti Synshar ka Ri, ka dei ban iada bad pynneh ia ka riti bat khyndew ki Khasi hapoh u pud u sam jong ka.
Ki Dorbar Shnong, Dorbar Raid bad Dorbar Hima ki dei kiba bor treikam kiba don ia ka bynta kaba khraw bha ban iada ia ka riti dustur bad ka riti bat khyndew jong ki paid Khasi.