Shillong, 20 Nailar 2025 – Ka Sorkar MDA ka la pynkhreh ban wanrah shibun ki projek pynroi ban kyntiew ïa ka ïoh ka kot bad ka jngohkai pyrthei ha ka jylla. Hynrei, ka jingpynsangeh kaba khraw ïa kine ki kam pynroi ka long ka jingpyrshah jong ki paidbah namar ka jingpynjulor ïa ka mariang, ka jingduh ïa ka umbam umdih bad ka jingtynnad jong ka mariang tang namar ka jingpom dieng na ka bynta ban shna ïa ka jingkieng Ropeway kaba pynïasoh na Raid Laban sha Lum Shillong.
U MDC ka 15-Laban Mawprem Constituency, u Ricky Shullai, uba la iohi da la ka jong ka khmat ïa kane ka jingjia, u la pynpaw ka jingsngew lyngngoh bad u la ong ruh ba ki paidbah kim sngewnguh satia ïa ka rukom treikam. Nalorkata, ha ka 20 tarik Nailar, u la leit ban ïakynduh ïa u Myntri ka Tnat Tourism, Bah Paul Lyngdoh, ban pynsngew ïa ki jingeh bad jingpyrkhat paidbah ba donkti halor ka Shillong Peak Ropeway Project, Madan Laban.
U Shullai u la ong ba kum u nongmihkhmat paidbah, u la pynpaw sha u Myntri ïa ki mat ba kyrkieh, kynthup:
Ka jingpyrkhat paidbah halor ka jingpynjot mariang bad ka jingshah ktah ki surok paidbah.
Ka jingshah khyllem ki dieng ha kine ki sngi kaba la ktah jur ïa ki shnong bad ki jaka um.
Ka rai jong ka Dorbar Shnong Laban ban thaw ka komiti kyrpang ban leit pynleit jingmut halor ki jingdon jingem paidbah.
Ka jingdonkam ban pynlong ïa ka jingtohkit bniah da ki bor sorkar halor ka jingïapher jingmut hapdeng ka jingkyntiew jngohkai pyrthei bad ka jingpynneh mariang.
U MDC u la dawa ruh ba baroh ki kam kin long kiba khuid bad shai, bad ba baroh ki stakeholders – ki Dorbar Shnong bad ki paidbah – kin ïoh bynta lang.