Shillong, 7 Kyllalyngkot 2026:Tang hadien khyndiat sngi ba ka Synjuk ki Rangbah Shnong Pynthorumkhrah ka la khmih bniah ïa ka jingjaboh jabiañ ha shilynter ka surok Golflink bad ha ki rud ki kiar jong ka, la lap ba ka jinglong jingman ka la sniew bha, ym tang namar ka jingtheh pathar ïa ka debris bad khyndew hynrei wat namar ka jingleh khlem akor jong katto katne ngut ki paidbah.
Ki Rangbah Shnong ki la ai ka jingpyntip sha ka Shillong Golf Club ba ka dei ban shimkhia bad ban pynkhuid shwa ïa ki jingjaboh kiba ktah ïa ka mariang bad ïa ka jinglong jingman jong ka thaiñ.
Na ka liang u Rangbah Shnong ka Golflink, u Bah Michael Hek, uba long ruh u Chairman ka Synjuk ki Nongsynshar Shnong Pynthorumkhrah, u la pynpaw ïa ka jingbitar kaba jur halor katei ka kam. U la ong ba mynta ka thaiñ Golflink–Pynthorumkhrah ka la kylla kum ka “martens” jong ka jingjaboh namar ka jingtheh khyndew, ka debris bad ka jingbret ñiut na ki kali da ki paidbah khlem ka jingïatreilang bad ka Dorbar Shnong.
Haba kren sha ki lad pathai khubor ha ka jingïalang ba la pynlong da ka Dorbar Shnong Golflink, u Bah Michael Hek u la ong ba ka jingtheh pathar ïa ka khyndew bad ka jaboh na ki kam shna building khlem ka jingmynjur ka Dorbar Shnong ka la wanrah ïa ka jingeh kaba khraw ïa ki paidbah, ka pynmih ïa ka jingma ïa ki paidbah ba ïaid kjat, ïa ki kali bad ruh ïa ki nongshong shnong ha katei ka thaiñ.
U la pyntip shuh shuh ba ka Dorbar Shnong kan ym map ïa kino kino kiba pynkheiñ ïa ki kyndon shnong, bad lada lap ïa kum kine ki kam, kin shah daiñ kuna haduh ₹1 lak.
U Rangbah Shnong u la ong ba kine ki kam ki la jia khlem ka jingtip ne ka jingmynjur jong ka Dorbar Shnong, bad u la maham tyngeh ba ka shnong kan ym shah ïa kano kano ka kam kaba pynthud ïa ka jingshngaiñ paidbah, ïa ka jingkhuid jingsuba bad ïa ka jingïatylli jong ka mariang ha katei ka jaka.
U Bah Michael Hek u la ban jur ba ka Golflink ka dei ka jaka ba pawnam ha nongbah Shillong, bad ka jingtheh jaboh khlem akor kam tang ba ka pynmih ïa ka jingkhapngiah kali hynrei ka pynsniew ruh ïa ka dur bad ka burom jong katei ka thaiñ. U la kyntu ïa ki nongtrei kontrak, ïa ki briew shimet bad ïa ki bor ba dei khmih ba kin sangeh mardor ïa kum kine ki jingleh bad ban bud ryntih ïa ki kyndon jong ka jingpynkhuid
Shuh shuh, u la kyrpad ïa ki bor district ba kin shimkhia mardor pyrshah ïa kito kiba donkti ha kine ki kam bym hok, bad ban peitngor bha ïa ka jinglong jingman khnang ba yn lah ban khanglad ïa kum kine ki jingleh ha ka lawei.
U la pynkut da kaba ong ba ka Dorbar Shnong Golflink kan sa shim ïa ki sienjam kiba donkam, kynthup ïa ka jingujor paidbah sha ki bor ba dei khmih, lada ym lah ban pynbeit kloi ïa kane ka mat kaba ktah ïa ka shnong bad ïa ka mariang.
