Shillong, 4 Nailar 2025 – Haba don ka mon ba skhem jong u nongmihkhmat ba la jied da u paidbah, ka jingïarap ïa ka imlang sahlang ka long kaba shisha. Dei halor kane ka nongrim ba u Bah Sanbor Shullai, MLA ka South Shillong constituency, u la mih shakhmat ban shim bynta hi dalade ban jurip ïa ka surok kaba don ha Rilbong Point, kaba long ka lynti kaba kongsan ban pynïasoh ïa ki bynta jong ka sor Shillong.
U Bah Sanbor, u dei u nongmihkhmat uba la ju paw paidbah kum u Nongthaw Aiñ, thaw lynti, pun jingkieng, uba ju pyni ba ka kam u paidbah ka long kaba hakhmat eh. Wat ha ki por slap ruh, um ju salia ban ñiom, kumba la sakhi ha kane ka jingleit jurip kaba u la leh hi dalade ha ka surok Rilbong – ka surok kaba pynïasoh na Iing Assembly Shipor sha Rilbong Point.
Ha ka jingïakren bad ki lad pathai khubor, u Bah Sanbor u la ong, “Ka South Shillong ka dei ka konstitwensi kaba ïaid shaphrang, hynrei ka dang donkam shuh shuh ki kam pynroi. Ka jingpynbha ïa kane ka surok Rilbong ka dei ka bynta kaba kongsan eh.”
Ha kane ka jingleit jurip, la synran lang da ki engineer ka PWD (Roads) kiba la shim jingshai halor ka jinglong jong ka surok, bad la pyntip ba yn sdang noh mardor ban trei ïa ka bynta jong ka black-topping, bad ruh ban pynbha ïa ki drainage system bad water outlet, khnang ba um kin nym tuid shapoh surok ha ki por slap.
Ka jingpyrshang jong u Bah Sanbor ban long uba la kloi ban sngap bad ïarap ïa u paidbah, khlem kheiñ jaitbynriew, ka kynja ne ka nongrim niam, ka pyni ïa ka mynsiem jong u nongmihkhmat uba khuid ka jingthmu.
U la khot ruh ïa ki paidbah ba kin long kiba kloi ban ai jingtip bad ïatreilang bad ki bor synshar lada don ki bynta ba dang donkam ban leh ei ei. “Kumno ngi lah ban kyntiew ïa ka shnong ka thaw lada ym don ka jingïatrei lang bad ka jingïatiplem?”, la ong u Bah Sanbor.
Kane ka jingleit jurip ka pyni shai ba u Bah Sanbor Shullai um dei tang u nongmihkhmat hynrei u dei ruh u nongïalam ba kloi ban trei na ka bynta ka bha ka miat jong ka imlang sahlang.