Shillong, 10 Nailur 2025:
U Limison D. Sangma, MLA jong ka Raksamgre, u la thep kyrteng mynta ka sngi na ka bynta ban long u Deputy Speaker jong ka Meghalaya Legislative Assembly hadien ba u Timothy D. Shira u la iehnohkam ha ka taiew bala dep.
U Commissioner bad Secretary jong ka Iingdorbar Thawaiñ, u Bah Andrew Simons, u la pyntip ba u Bah Limison D. Sangma u long tang ma u hi uba la thep kyrteng. Ka jingthep kyrteng jong u la shah ai jingkyrshan da u Myntri Sorkar bad MLA jong ka Williamnagar, u Marcuise N. Marak, bad la pynïar da u MLA jong ka Phulbari, u Abu Taher Mondal.
U Simons u la ong ruh ba ka 10 Nailur ka dei ka sngi ba khatduh ban thep kyrteng, katba ka 11 Nailur ka dei ka sngi ba khatduh ban weng kyrteng. Ka elekshon la buh ban long ha ka sngi Thohdieng, 12 Nailur 2025. U la kdew ruh ba namar ym don shuh kiba thep kyrteng na ka liang ka Liang Pyrshah, kumta u Limison D. Sangma un long uba jop khlem don kiba iakhun pyrshah. Ka jingpynbna pura kan sa long ha ka Iingdorbar da u Speaker, Bah Thomas A. Sangma, ha ka sngi Thohdieng.
Haba kren sha ki nongthoh khubor, u Speaker u la pynshai, “Katkum ka schedule, lashai ka long ka sngi ba khatduh ban weng kyrteng. Lada don ba weng kyrteng, ngin hap ban pynkylla biang ha ka jingpynbna. Hynrei katkum ba long mynta, ngi la ioh tang kawei ka jingpropose bad kawei ka jingthep kyrteng.”