Shillong, Naitung 12: U rangïalehkai ba la jop bad ioh iaka Indian Super League (ISL) 2024-25 bad u nongjop Golden Boot bad iaka Golden Ball, u Alaaeddine Ajaraie u la pynthymmai ïa ka jingïateh kular jong u ba un dang sah beit ha ka NorthEast United FC ban ialehky na ka bynta ka samoi ïalehkai 2025-26.
U Ajaraie u la pyniasoh bad ka NorthEast United FC ha kaba sdang jong ka jingialehkai 2024-25 halor ka jingiateh kaba kynthup ia ka jingjied na ka bynta ka snem kaba ar, katkum ka jingpyndep ia ki kyndon treikam ba kyrpang. Hadien ka jingïalehkai ba nyngkong eh ha ka phutbol India, une u rangïalehkai ba shakhmat jong ka Morocco u la pyndep ïa kita ki jingdonkam, da kaba pyntreikam hi dalade ïa ka jingpynjlan ïa ka jingïateh kular. U Ajaraie ruh u la thrang ban bteng ïa ka jingïaid lynti jong u bad ka klob bad u la pynpaw ïa ka jingkwah jong u ban sah bad ban tei ïa ka jingïalehkai ha baroh kawei ka samoi.
U Ajaraie, uba 32 snem ka rta, u la ïoh mad ïa ka samoi kaba nyngkong kaba itynnad bha, da kaba thep 29 kol bad 10 tylli ki jingïarap ha ki 32 tylli ki jingïalehkai ha baroh ki jingïalehkai. U la plie ïa ka account jong u ha ka jingïalehkai ba nyngkong jong u bad ka klob — ka jingïalehkai ha ka Durand Cup pyrshah ïa ka Border Security Force FC — bad u la leh ïa ka bynta kaba kongsan ha baroh kawei ka jingïalehkai, kynthup ha ka phainal, ha kaba u la thep, ïarap, bad pynkylla ïa ka penalty jong u ha ka jingïasiat ban ïarap ïa ka NorthEast United FC ban ïoh ïa ka nam silverware kaba nyngkong eh jong ki.
Ha ka ISL, u Ajaraie u la lah ban thep ïa ka rekod da kaba thep 23 kol bad ai jingïarap hynriew tylli ha ki 25 tylli ki jingïalehkai, ha kaba u la ïoh ïa ka khusnam bad ka bol ksiar. U la pynkut ïa kane ka samoi ïalehkai da ka jingïalehkai kaba nyngkong jong u na ka bynta ka klob ha ka jingïakhun kaba jop ïa ka Mohammedan SC da 6-0 kol ha ka Kalinga Super Cup.
U Ajaraie u la pynpaw ïa ka jingsngewnguh kaba khraw ïa ki paralok jong u, ki nonghikai, bad ki nongpynïaid. “Nga sngew kmen hangne; ka NorthEast ka sngew kumba ka don ha ïing mynta. Ki paralok bad ki nongtrei jong nga ki la don ka bynta kaba kongsan ha ka samoi ba nyngkong jong nga kaba jop, bad nga ngeit skhem ba ngin lah ban jop kham bun ryngkat ha ka samoi ban wan. Nga thrang ban bteng ïa kane ka jingïaid lynti bad ban jop ïa ki nam lahduh kiba kongsan bad kane ka klob ba phylla,” ong u Ajaraie.
